Шукерте огыл Марий кугыжаныш университетыште «МарГУ-н миссше – 2026» моторлык конкурс лийын. «Калыкын чонжо» номинацийыште психолого-педагогический факультетын студенткыже, Татарстан кундемыште шочын-кушшо марий ӱдыр Анюта Ишимова палемдалтын.
Йоча-влакым йӧрата
Аня Кукмарий районысо изи Курыкӱмбал ял гыч. Тысе школышто 9-ше класс марте тунемын, «Кна вел» фольклор ансамбльыште шуаралтын. Ӱдыр изинек марий шӱлышан кушкын.
– Йоча-шамыч дене пашам ышташ йӧратем. Садлан 9-ше класс деч вара Арскысе Габдулла Тукай лӱмеш педагогический колледжыш тӱҥалтыш класслам туныктышылан тунемаш пуренам. Чон йодмо почеш кӱшыл шинчымашым налаш Марий Элыш толынам. Тидлан Марий кугыжаныш университетым ойыренам. Ты университетын студенткыже улмемлан моткоч йывыртенам. Ӱдыр-рвезе-влак икоян, кеч-кунамат полшаш ямде улыт.
Эше колледжыште тунеммем годым практикыште икшыве-влаклан йӱкым чын шындаш полшаш шонымашем шочын. Ик классыште тунемше ӱдыр икмыняр йӱкым ойлен моштен огыл. Тунам ончыкылыклан могай направленийым ойырынем – пале лийын, – каласкала Анюта.
А.Ишимова университетын илышыштыже чолган участвоватла. Тыгодым сайын тунемеш, старостын пашажым вораҥдара, факультетын студактивыштыже шога. Ӱдыр «Голос Юности», «Студент шошо» усталык фестивальлаште мастарлыкшым ончыкта. Иктаж мероприятийыш ушнаш йӧн уло гын, вигак келшем, манеш. Анюта тыгак университетысе волонтёр-влак толкынышто тырша. Нуно тунемме тӧнежысе, республикысе але оласе мероприятий-влакым эртараш полшат.
Киношто модеш
Анюта университетыште веле огыл чолгалыкше дене ойыртемалтеш. Идалык утла наре ӱдыр MaxkamShow киностудийыште мастарлыкшым тапта. Фильмлаште да сериаллаште сниматлалтеш. Эртыше кеҥежым кӱчык метражан «Я, что убивает» шучко фильмыште тӱҥ героиньын, Алиян, рольжым модын.
– Тыгай рольлан, конешне, ямде лийын омыл. Но мыланем оҥайын, тунамак ойыртемалтшын чучын, – палемда тудо.
А.Ишимован кажне кечыже асписаний почеш эрта. Туге гынат ӱдыр каналташ жапым муаш тырша. Тыгодым тудым пайдалын эртара: яндар юж дене шӱла, спорт дене заниматла, сӱретла. Ончыкыжым Анюта налме специальностьшо дене пашам ышташ шона. Тидлан шинчымашыжым нӧлташ, тунемаш тореш омыл, манеш.
А.Ишимован альбомжо гыч налме фото.