Тула областьыште «Я в Агро» Всероссийский конкурсын икымше тургымжын финалжым иктешленыт. Тудым Российысе молодёжьын «АГРОПРОдвижение» ялозанлык форумжо кышкарыште эртареныт.
Конкурсын финалже элнан 50 кундемже гыч ялозанлыклаште тыршыше 700 наре агромолодёжьын представительжым, агрокласслаште тунемшым, АПК-н пашаеҥжым да специалистше-шамычым чумырен.
Участник-шамычын тӱҥ шотышто практикыште моштымашыштым тергеныт. Нуно АПК-м вияҥдымаште шке проект пашаштым радамленыт, агрополигонышто мастарлыкыштым ончыктеныт, тылеч посна «Регион-влак ярмиҥгаште» шке лектышышт дене палдареныт.
Конкурсын тӱрлӧ йыжыҥжым эртымеке, икымше верым Татарстан Республикын командыже налын. Тудлан «Комплексное развитие сельских территорий» программе почеш куд проектым илышыш шыҥдараш вич миллион теҥгем пуэныт. Кокымшо верыште – Марий Эл, кумшо вер дене Вологода да Тула областьлам палемденыт. Призёр команде-влакым шергакан пӧлек дене суапландареныт.
Палемдыман, «Я в Агро» Всероссийский конкурсым 2025 октябрьыште икымше гана эртареныт. Тудлан Российысе Ялозанлык министерстве, Росмолодёжь, Российысе Молодёжь-влак ушем вуйын шогат.