«Марий улмем ден кугешнем!»

Еш альбом гыч налме фото.

Пермь кундем гыч чолга марий рвезе Александр Прокопьев тений Марий самырык тукым слётын ик участникше лийын. Уста гармоньчын лукмо семже почеш иктат тавалтыде чытен огыл.

Аважын шочмо верыш

Такшым Александр слётыш нылымше гана ушнен. Шернур район Марисола селаште, Морко район Унчо селаште, ӱмаште Звенигово олаште лийынам манын палдарыш шкеже.

– Ачамат, авамат марий улыт, садлан мыланем ты слётын участникше лийманак ыле. Икымше гана Пермь оласе марий рӱдер гоч слётыш ушненам. Варажымат ты мероприятийыш толаш кумылем лектын. Марий Элыште лияш кажне ийын утыр веле келша. Тений, мутлан, тоштерлаште экскурсий дене коштмо поснак шарналт кодын, – манеш А.Прокопьев.

Адакшым Саша Марий кундемыш слётыш толмыж годым аваж могырым родо-тукымжо дене вашлиеш. Аваже Дина Ивановна – Кужэҥер район Шойдӱҥ ял гыч. Марий пединститутым тунем пытаренат, Пермь кундемыш каен да Суксун район Эҥермучаш ялысе школышто марий йылме ден литературым, руш йылмым туныкташ тӱҥалын. Эҥертӱҥ пошкудо ялын качыже Иван Владимирович дене ешым чумыреныт.

Изинек уста

Саша изинек марий тӱвыралан шӱман кушкын. Кум ияшак тудо марий диск-влакым ончен, шке семынже марла мурен да куштен. Марий Эл гыч толшо артист-влакын ик концертыштымат коден огыл, нунын дене пырля сценышкат лектын. Школыш коштмыж годымат ятыр марий мероприятийыш ушнен.

А.Прокопьев Пермь оласе ик колледжым пытарен, кызыт автошколышто вождений инструкторлан ышта. Тылеч посна шке кундемысе марий мероприятийлаш кумылын ушна. Тений, мутлан, ачажын шочмо Кызганде ялыштыже эртаралтше Пеледыш пайремыште выступатлен.

– Гармоньым, блок-флейтым, шӱвырым шоктем, тӱмырым перкалем. Тӱрлӧ семӱзгарым шокташ изинек кумылан лийынам. Шарнем, Пошкырт кундем Бирск ола гыч марий-влак Кызганде ялыш ик мероприятийыш толыныт ыле. Мыйым, изи рвезым, блок-флейтым шокташ туныктеныт. Иктаж шым-кандаш ий ончыч гармоньым кидышкем налынам. Ончыч куштылгырак семым шоктен, видео-влакым ончен да аудиозапись-шамычым колыштын, ты семӱзгарым шокташ тунемынам. Пермь оласе «Марий аршаш» ансамбльыш гармоньчылан коштам. Кундемыштына эртаралтше мероприятийлаш мемнам чӱчкыдын ӱжыт, – палдара Александр.

Ача-аважат эргыштын усталык шӱлышыжым вияҥдаш полшен шогат. У гармоньым налын пуэныт, марий тувырымат пӧлекленыт.

Марий ешыште шочын-кушмем, марий улмем дене кугешнем, манеш Саша. А Марий Элышке чонжо эре шупшеш, садланак, йӧн да жап лийытат, уло кумылын толын кая.