Марий Турек район Сысоево тӱвыра пӧртым тысе пашаеҥ-влак кажне ийын уэмдат.
Теве тудын йыр кугу кӱ дене кум клумбым келыштарыме. А тушто шындыме пеледыш-влак торашке волгалтыт да кумылым нӧлтат.
– Кодшо ийын Сысоево тӱвыра пӧртышкӧ балетмейстерлан Лариса Рыбакова пашам ышташ тольо. Тудо сӱретлашат мастар. Лариса Викторовна тиде сӱрет-влакым верештын да темлен. Эн ончычак тудын авторжо художник Анна Санникова дене кутырен, а сӱретше-шамычым шке кугемден сӱретлен. Ынде ныл окна йымалысе ош пырдыж марий сынан лийын. А тений Индеш кугарня деч ончыч пурымаште марий узорым келыштарышна. Чыла тидыже шкаланнат, толын кайыше уна-шамычланат келша, – каласкалыш «Савак кундем» ансамбльым 13 ий вуйлатыше Валентина Малкова.
Сысоево ялышке чӱчкыдынак турист-влак толын каят. Тыште мастар еҥ Илья Богдановын пу дене сӧрастарыме кудыжым ончат да тӱвыра пӧртышкӧ пурен лектыт. Нуным тушто «Савак кундем» ансамбль вашлиеш. Каласыман: тиде ансамбльыш коштшо ӱдырамаш-влак калык ончыко ончычсо семынак шымакшан да йыдалан лектыт. Тидденак нуно ойыртемалтыт.
Тылеч посна ты кундемыште ожнысек Индеш кугарня пайремым жаплат. Сандене ты йӱлам калык коклаш шараш манын, Сысоево тӱвыра пӧртын пашаеҥже-влак икмыняр ий ончыч «Индеш кугарня» мероприятийым эртараш тӱҥалыныт. Тений тудо 12 июньышто лийын.
Такшым Индеш кугарня годым марий-влак кумалыныт. Тыгай кумалмаш пошкудо Параньга район Кугу Пумарий ялын кӱсотыштыжо эрта. Сысоево вел гычат кумалаш лачак тушко коштыт. Вара пашаеҥ-влак (а тыште кызыт вич еҥ пашам ышта) кумалын толшо-влакым Сысоево тӱвыра пӧртыштӧ вучат. Тышке тений Марий Турек районысо ялла да Виче кундем гычат ансамбль-шамыч толыныт, шкешотан пайремым эртареныт. Йоча-шамычлан модыш ден аттракцион лийыныт. А кастене чыланат Марий касыш чумыргеныт.