Арамлан огыл кугезына ойлен: «Йылме ден йӱланам мондена гын, калыкнат пыта». Тиде ой шӧртньӧ дене иктак. Тачысе саманыште марий йылмынам да коча-кованан йӱлаштым арален огына тол гын, чынак, калыкнан пиалан ончыкылыкшо нерген шоныманат огыл.
Тиде пӱсӧ йодышлан поснак кугу тӱткышым туныктымо ден тӱвыра алан ойырен шогышаш. Тӱвыра пӧрт ден школ пырля пашам шуктен толыт гын, кугезынан йылмыжат, йӱлажат да вияҥын толмо корныжат огыт мондалт. Тидым шотыш налын, Кораксола тӱвыра пӧрт ден Шӱргыял школат шке пашаштым икой дене пырля ыштен шогат. А пырля ыштыме пашан лектышыжат тӱвыргӧ саскам пуа да чонымат вӱчка.
Шукерте огыл Кораксола тӱвыра пӧртыштына черетан Марий кас эртыш. Касым «Муро кумыл» фольклор ансамбль, Ярансола ялын чолга гармоньчыжо Вениамин Борисов, Шӱргыял школын изи шӱдыржӧ Надежда Сергеев да Кораксола ял калык сӧрастареныт. Кас мучко тошто муро-влак веле йоҥгеныт. Надежда Сергеева шиялтыш дене кок семым шоктен, «Тыныс жап» почеламутым лудын пуэн. Тыгак еҥ-влак тӱрлӧ сынан таҥасымашыш ушненыт. Яра шинчаш иктат ярсен огыл.
Елена Григорьева, Кораксола тӱвыра пӧрт вуйлатыше.
Снимкыште: Марий кас годым.
