Ик интернет лаштыкыште марий шӱлышан тӱрлӧ сӧрастарыш, вургем фотом, видеом ужмеке, ты лаштыкын озаж дене лишкырак палыме лияш кумылаҥым.
Татарстаныште шочын, Удмуртийыште ила
Татарстан кундем Агрыз район Кадрек ялеш шочын-кушшо Анастасия Бабикова кидпашалан изинек шӱман кушкын. Ижевск оласе Одо кугыжаныш университетын экономике да управлений институтшым тунем лекмеке, налме профессийже почеш ты республикысе ик кугу холдингыште пашам ышта. Ты паша ӱдырын шуко жапшым налеш гынат, чон йодмо сомыллан жапым муаш эреак тырша. Анастасия ойла:
– Мый шке кид дене тӱрлӧ моторлыкым шочыкташ изинек йӧратем. Тукымыштем ятыр кидмастар-влак улыт. Но тӱҥ кумылаҥдышем-шамыч – ача-авам. Нуно суртнам, пӧртнам эреак сылнештарен илат. Садлан моторлыкым ужаш да шижаш нунын деч тунемынам.
Усталыкемын тӱҥ йыжыҥже – натуральный кӱ, минерал гыч ыштыме сӧрастарыш-влак. Нуным кызытсе илышлан келыштаралтшым шочыкташ тыршем. Тыгак «Марий вургем» брендым вияҥдем. Ты йыжыҥ почеш марий калык вургемым, сӧрастарышым, аксессуарым келыштарем. «Марий вургемым» ышташ тӱҥалмем годым шканем ойыртемалтше, оҥай, кызытсе илышлан келшыше, молын гае огыл сатум шочыкташ палемденам. Тыге коллекцийыштем шем тӱсыштӧ йылгыжше тӱсан возымашан футболко лектын. Тидыже марий тӱвыралан ойыртемалтше тӱс. Вет мемнан вургемыштына утларакшым ошо да йошкарге тӱс палдырнат.
Тыгай келыштарымаш-влак мыйым йӧршынат огыт лӱдыктӧ. «Марий вургем» бренд калык йӱланам да тӱвыранам веле огыл, моло моторлыкымат ончыкташ виктаралтын.
Бренд, паблик…
Кидмастарын ойыртемалтше дизайнже ятыр еҥын кумылжым савырен. Ӱдыр шуко еҥ деч тидын шотышто моктеммутым колеш. Тудо шке сатуж дене тӱрлӧ ярмиҥгашке лекташ тырша.
– Шочыктымо вургемем деч вара моло-шамычымат ты пашалан кумылаҥдымемым шижынам. Ик могырым, тиде сай, вет пашам ала-кӧн чонжым тарватен. Но вес могырым, кунам тыйын идейым шолыштыт, сайжак огыл. Туге гынат тыгай опыт ончыко каяш, ум шонен лукташ тарата.
«Марий вургем» бренд дене пырля ик соцкылыште «Марий калык» паблик шочын. Нуно кызытат чак кылдалтыныт. Коклан ты пабликын подписчикше-шамычлан тӱрлӧ пӧлекым ыштылам. Аккаунтым вӱдаш шӱжарем полша. Тудо марий-шамыч нерген тӱрлӧ видеом келыштара да соцкылыш луктеда. Тылеч посна телефонлан да брендлан оҥай, ойыртемалтше стикер-шамычым ямдыла, – каласкала кидмастар.
Анастасиян тӱҥ эҥертышыже – ача-аваже, шӱжарже, пелашыже. Нуно кеч-кунам тудлан полшаш ямде улыт. Ойлымыж почеш, мокталтен каласымышт деч вара пуйто шулдыржо эшеат кушкеш. Тылеч вара вургем, сӧрастарыш-влак тӱжем пачаш моторрак да чоныш пижше шочыт.
Тӱрлӧ кундемыш
– Кеч-могай сӧрастарыш мыланем «аралтыш» семын радамлалтеш. Садлан еҥын шинчаончалтышыже эн ончыч образысе эн чевер, волгалтше арверыш виктаралтшаш. Но мый чевер да утыжым тыглай огыл сӧрастарышым ик семынак шочыкташ йӧратем. А кунам ала-мом ум шонен муам да ыштем, эшеат йывыртем. Тыгай годым у эмоцийым шижам, – палемда А.Бабикова.
Кеҥежым «Марий вургем» брендын сатужым налаш кумылан-шамыч утларак улыт, мане ӱдыр. Тудын сӧрастарышыжым да вургемжым Ижевскыште, Йошкар-Олаште, Санкт-Петербургышто, Екатеринбургышто, Москошто, Сургутышто, Ӱпыштӧ, Сочиште, Севастопольышто, Озаҥыште да моло олалаштат чият, нумалыт. Тылеч посна Китайыш да Кипрыш йодмо почеш колтен.
Тӱрлӧ моторлыкым шочыкташ идей-влак кушеч да кунам толыт, йодым Анастасия деч. Вашмут тыгерак йоҥгыш:
– Тидым каласаш йӧсӧ. Вургемыште, мутлан, шукыштлан палыме марий тамга-влак машинке дене тӱрлалтыт. Мый дизайным келыштарем, а сӧрастарыш-шамычым чон йодмо почеш шочыктем.
Кидмастарын сӧрастарышыже, вургемже, чынжымак, ойыртемалтше да кумылым савырыше улыт. Теат нуным эскерынеда гын, «Марий вургем» аккаунтыш ушнен кертыда.