5 мартыште Марий кугыжаныш университетын 16 сымыстарыше участницыже «МарГУ-н миссше – 2026» чап титул верч таҥасен. Сеҥышыш Йошкар-Олаште шочын-кушшо Анастасия Попцова лектын.
Тылзе жапыште ӱдыр-влак университетын шошымсо тӱҥ шоужлан кыртмен ямдылалтыныт: кажне кечын репетицийыш коштыныт, сценыште мотор вургем дене кошташ, куштымаш номерым тунемыныт да хореограф-влак дене пашам ыштеныт. Тыгак нунылан актёр мастарлык, сценыште кутырымо да имидж шотышто мастер-класс-влак эртаралтыныт, оҥай квизыште уш-акылыштым тергеныт.
Спортым да куштымашым йӧрата
Ӱдыр физике да математике факультетын «Современные радиолокационные системы дальнего обнаружения» направленийже дене икымше курсышто тунемеш.
– Мый Йошкар-Оласе 11-ше номеран лицейым шӧртньӧ медаль дене тунем пытаренам, сандене университетыш тунемаш пурымем годым шинчымашем сай лийын манын кертам.
Единый кугыжаныш экзаменым физике дене сдатленам, сандене тыгай направленийым ойырен налынам. Программына Москосо физико-технический университет гоч илышыш шыҥдаралтеш. Направлений пеш ойыртемалтше да оҥай, ончыкыжым тӱрлӧ кейсым куштылгын решатлен керташ манын, Москосо туныктышо-влак мыланна келге шинчымашым пуат. Тунеммаш, мутат уке, куштылгын ок пуалт, но сессийым «4» ден «5»-лан гына сдатлаш манын, шуко вийым пыштем.
Профессием дене тыршаш тӱҥаламак манын але ойлен ом керт, но мыланем еҥ-влак дене пашам ышташ келша. Мый мутланаш йӧратыше, куштылгын кылым муын моштышо улам, сандене ончыкылык пашамат еҥ-влак дене кылым кучымо дене кылдынем, – каласкала А.Попцова.
Анастасия факультетын студент илышыштыже чолган участвоватла. «Голос юности» ден «Студенческий шошо» конкурслашке ушнен. Тыгак «Мо? Кушто? Кунам?» интеллектуал модыш дене сборный командыште модеш. Яра жапыште кушташ да тӱрлӧ спорт дене кылым кучаш: ече дене кошташ, ияш, волейбол дене модаш – йӧрата. Тудо изиж годсек тӱрлӧ куштымаш: бальный, эстрадный, хип-хоп – дене заниматла. Садлан сцене деке тунемынам да выступатлаш йӧратем манын палемда.
Школ жапыште тыгак тӱрлӧ волонтёр толкыныш да акцийыш ушнен. Кажне кеҥежым лагерьлаш вожатыйлан пашам ышташ
коштын.
Моторлык нерген веле огыл
– Моторлык конкурс моторлык нергенак веле манын ончыч шоненам. Но «МарГУ-н миссше – 2026» шонымашем тӱрыс вашталтен. Тидыже шкем шуарыме, тунемме деч вара кажне кечын икмыняр шагат дене репетицийыш кодмо, нойымо деч шинчавӱд лекме нерген улмаш… Но эше – у вашлиймаш да аклаш лийдыме опыт нерген.
Тылзе мучко мый моло ӱдыр-влак дене пашам ыштенам! Кажныже шкенжым сай могырым ончыктен. Тӱҥалтыштак таҥасыше-влак дене келшаш лийдымыла чучын. Но ме ик кугу ешыш савырненна, тушто кажныже полшаш, азапланаш да, кӱлеш лиеш гын, аралаш шогалаш ямде.
Тыгай кугу мероприятийлан тунеммашым да ямдылалтмашым иктеш ушаш моткоч неле лийын, но ме тидым ыштен кертынна да ончышо-влаклан волгыдо да сай шижмашым пӧлекленна.
Мыйын сеҥымашем – тиде пеш шуко еҥын надырже. Лишыл еҥем, йолташем-влак, куштышо коллектив, физике да математике факультет гыч студент-влак эре пеленем лийыныт да полшен шогеныт, тидлан мый нунылан тауштем.
Марий кугыжаныш университет – тиде шкем шуарымылан эн сай вер, тыгай чапле вузын студенткыже улмем дене кугешнем, – манеш Анастасия.
МарГУ-н тӱшкаж гыч налме фото.