30 майыште элнан 60 наре олаштыже Ужар марафон 13-шо гана эрта. Тудо Калининград гыч Владивосток марте куржталаш йӧратыше-влакым чумыра. Тушко ушнаш шонышо-шамычлан регистрацийым reg.greenmarathon.sberbank.ru/info/marat сайтыште эртыман.
Кундемыштына марафон Йошкар-Оласе Патриарший площадьын кумдыкыштыжо лиеш. Программе почеш участник-влаклан 4,2 меҥгым куржаш, тынарак кужытым йӱдвел коштмаш дене таҥасымашыште эрташ палемдыме. Тыгак 4-9 да 10-13 ияш йоча-шамычлан 420 метр кужытышто вийым тергаш, тынарак метрым начар тазалыкан еҥ-шамычлан эрташ келыштарыме. Тылеч посна модыш, пӧлек модылтмаш да тӱрлӧ молат лийыт.