«Марий Эл» газетын интернет-редакторжо Лидия Шабдарова Шернур район Мустай ялеш шочын. Ончыч верысе школышто тунемын, вара ешыже Советский район Роҥго селаш илаш куснен. Тыге ӱдыр тысе кыдалаш школышто умбакыже шинчымашыжым нӧлтен. Шке фамилийже нерген Лидия тыгерак палдарыш:
– Тукымем Виче кундемысе Лебяжье район Изи Морко ялыште тӱҥалтышым налеш. Кугурак-влакын ойлымышт почеш, ала-кунам ожно Шабдаров-шамыч ик эн кугу тукымлан шотлалтыныт. Нунын тӱрлӧ кундемыш илаш куснымышт дене кугу тукым шаланен пытен. Садлан. кажне гаяк Шабдаров-влакын тукымвожыштым келгынрак шымлаш гын, икте-весыланна тора родо лийына, шонем. Тыгак палем, фамилийысе «шаба» ужаш мокша йылмыште йоча манмым ончыкта.
Мый Шабдарова фамилиян улмем дене моткоч кугешнем. Вет марий тӱняште тыгай фамилиян лӱмлӧ еҥ ятыр. Кумдан палыме да чапланыше марий классик Шабдар Осыпын лӱмжак мом шога! Тудын шочмо Изи Лужалу ялже шочмо верем деч кок-кум меҥге тораште веле верланен. Тушто мыланем шуко гана лияш пиал логалын. Тыгак Шернур район Марисола кундемыште Шабдаров фамилиян лӱмлӧ еҥ-шамыч улыт. Мутлан, поэт да мӱкшызӧ Сергей Шабдаров. Самырык мурызо Катерина Шабдар, шанчызе Людмила Шабдарова да молат мыйын гае фамилийым нумалыт.
Л.Шабдарован альбомжо гыч налме фото.