Звенигово район Сергушкин ялыште Карсаковмыт еш ила. Юмылан тау, кызыт чыла сай. Лач сусыр шучко сӧйым ушештара.
Сурт оза Пётр Карсаковым СВО-ш мобилизаций дене наҥгаеныт. Тунам еш Татарстан Республикысе Зеленодольск олаште илен. Пӧръеҥын мӧҥгыштыжӧ кодаш йӧнжӧ лийын: тудын изи ӱдыржӧ начар тазалыкан. Но П.Карсаков чын патриот семын элым аралаш шогалын. Марий ӱдырамашын чонжым могай шижмаш авалтен, лач тыгаяк ситуацийыш логалше-влак веле палат. Ольга Карсакова каласкала:
– Повесткым ужмеке чот ӧрткенам. Кок йочана уло. Давид эргына кызыт 11 ияш, Алана ӱдырна 8 ияш. Алана инвалидностян, тудын ДЦП, врач-влак изиж годым ала кошташ тӱҥалеш але уке манын ойленыт. Кузе шкетын кок йоча дене кодам манын шоненам. Але вара Пётрлан мӧҥгыштӧ кодаш огеш лий манынам. Но пелашем мыйым колыштын огыл. «Патриот улам. Элнам, тендам аралышаш улам! Кажне пӧръеҥ ӧрдыжеш кодаш тӱҥалеш гын, тушман мемнан деке толешыс», – тыге веле ойлен. Мый ончыкылык верч лӱдынам, но колтенам.
Тӱҥалтыште чыла шотыштат неле лийын. Тунам шочмо Звенигово кундемышкем пӧртылаш шоненам. Ача-авам мыланем чот полшеныт. Нунын деч посна эшеат неле лиеш ыле.
Тыныс илышлан пел ий тунемын
Пётр Карсаков, повесткым налмеке, ик тылзе наре Озаҥ олаште СВО-ш каяш ямдылалтын. Мотострелковый войскаш логалын. Тунеммаш деч вара Луганск кундемыш колтеныт. Харьков направленийыште Купянскыште ик тале кредалмаште лийын. Тушто нелын сусырген.
– Разведчик-снайпер улам. Тӱрлӧ ситуаций лийын. Разведкышкат ятыр гана коштынам, сусыргышо йолташ-шамычымат луктынам. 2024 ий январьыште Купянск воктене нелын сусыргенам. Нылытын лийынна. Дрон мемнам ужын да мине-влакым кышкен. Тунам кум салтак колен. Мыйын шола могырем чот эмганен. Йол пудырген, пел капем чыла осколкышто лийын, ик шинчам пытен. Боевой йолташем-влак луктыныт да Белгородысо госпитальыш колтеныт. Тушеч вара Санкт-Петербургышто военно-медицинский госпитальыште ятыр жап эмлалтынам. Кызытат эмлалтам. Окшаклен коштам. 2025 ий шыжым мыйым комиссоватленыт. Кызыт 2-шо группо инвалидностян улам. Зеленодольскысо ик заводышто тыглай пашазе лийынам. Кызытат тушто улам, шогымаште ятыр жап пашам ыштен ом керт, сандене компьютер ончылно шинчем, – палдарыш «Карсак» позывноян салтак.
П.Карсаков СВО-што лӱддымылыкым шуко гана ончыктен. Тидыжым кок медальже да Патырлык орденже пеҥгыдемдат.
«Карсак» тыныс илышлан пел ий тунемын. Тӱрлӧ йӱк-йӱаным колыштын, трук иктаж-могай дрон чоҥешта, шонен. Малашат шижын мален. Ольга пелашыже чот полшен. Госпитальыште кийымыж годымат Ольга воктеныже лийын, кок ньогажым ача-аважлан коден да шӱм пелашыж деке каен. Тидлан Пётр ватыжлан таушта. СВО еш кылым эше пеҥгыдыракым ыштен. Тений П.Карсаков МарГУ-ш педагог-психологлан заочно тунемаш пураш шона. СВО-што лийше еҥлан психологын полышыжо кӱлешак, манеш.
Тылыште тыршат
«Карсак» тыныс илышыш пӧртылын гынат, СВО-што улшо салтакна-влаклан гуманитарный полышым пога. Фронтысо ситуаций нерген боевой йолташыже-влак деч умылкала. «Гуманитаркым» погымаште Ольганат надырже кугу. Тудо, пелашыжым СВО-ш ужатымеке, шкенжым чаманен шинчен огыл, а салтак-шамычлан полшаш йӧным кычалын.
– Тыл – кокымшо фронт, шонем. Мый «Жёны СВО» движенийын участникше улам. Мер пашаште тыршем. Тышке мыйым Озаҥ ола гыч Лилия Култышова конден. Тудынат пелашыже мобилизаций дене СВО-ш каен. «Гуманитарке» дене салтакна-шамычлан сеҥымашым лишемдаш полшена манын ӱшанем. Вет вий – порлыкышто, а сеҥымаш – икоян улмышто! Шке пашам дене моло ӱдырамашланат примерым ончыктынем. Вуйым нигунам сакыман огыл, – ойла Ольга Карсакова.
Ольга ончыч суд приставлан пашам ыштен. Шкенжым юрист пашаште ужын. Но кокымшо йоча шочмеке, пашаж гыч каяш логалын. Самырык марий ӱдырамаш шкенжым спортышто муын. Тудо Марий Элыште Тхэквондо федерацийым вуйлата. Звенигово олаште адаптивный тхэквондо дене тренерлан тырша. Ментальный нарушениян да инвалидностян йоча-влак дене пашам ыштен, нунын тазалыкыштым пеҥгыдемда, икшывын шке вийжылан ӱшаным муаш полша. Тхэквондолан кӧра мутланен кертдыме йоча-влак эркын дене кутыраш тӱҥалыныт. Поро пашан илышыже кужу лийже.
Тылеч посна О.Карсакова – «Спорт для СВОих героев» проектын авторжо. Спорт гоч ветеран-влак да нунын йочашт дене реабилитацийым эртара. Арам огыл тений чолга ӱдырамаш «Женщины НКО» икымше национальный профессиональный премийын финалисткыже лийын.
Калыкыште Юмо колта испытанийым тудлан, кӧ нелылыкым сеҥен кертеш манын ойлат. Кажне айдеме – шке койыш шоктышан. Икте йӧсӧ годым шкенжым чамана, ӧрдыж гыч полышым вучен шинча, весе, мӧҥгешла, ойгылан вуйым ок пу, ончыко ошкылаш вийым муэш. Тыгай улыт Карсаковмыт еш.