Тыгай лӱман всероссийский акцийлан келшышын, Марий Элыште киберлӱдыкшыдымылык да экстремизм темылан профилактике кутырымаш-влакым эртарат.
Правам аралыме органласе пашаеҥ-влак шукерте огыл Медведево посёлкысо 3-шо №-ан школышто тунемше 7-14 ияш ӱдыр-рвезе-шамыч дене вашлийыныт. Специалист-влак интернет аланыште шкем кузе кучаш кӱлмӧ нерген ойленыт, тыгак личный данныйым аралыме, правам пудыртымылан мутым кучымо нерген умылтареныт. Мошенник-влакын калыкым, поснак – йоча-шамычым, ондалыме схемышт нерген, тыгай «оптышыш» логалаш огыл манын мом ыштыман, палдареныт. Терроризм да экстремизм ваштареш кучедалме рӱдерын пашаеҥже терроризм ден экстремизмлан мут кучаш логалме нерген каласкаленыт да интернет аланыште шкем арален моштымо нерген видеороликым ончыктеныт.