Шернур район Лажъялын шочшыжо Александр Славинын марий тӱвыраште чолгалыкше дене ойыртемалтмыжым ынде ятыр ий эскерена. Тудо И.С.Палантай лӱмеш тӱвыра да сымыктыш колледж деч вара Озаҥысе кугыжаныш тӱвыра институтышко каен да ты олаштак лакемын.
«Икымше каналыште»!
«Икымше каналыште» кодшо арнян лекше «Поле чудес» программыште Озаҥыште илыше марий рвезе Александр Славин марлат ойлыш, шочмо кундемжылан саламым каласыш, шӱвырым шоктыш да Леонид Якубовичым тӱмырым перкалаш туныктыш. Тыгак шке «тройкыштыжо» сеҥышыш лекте. Финалыште покшелне шога ыле гынат, чаманена, модышышто тудлан модаш ыш логал.
– Баллым поген, шарнымашан пӧлек дене толам шонышым, но шонымашем ыш шукталт. А такшым тиде передачым эше ноябрь мучаштак сниматленыт, эфирыш февральыште гына лектын шуын, – манеш Саша.
– А кузе тиде лийынже?
– Тӱвыра институтышто тунеммем годсекак аккомпаниаторлан тыршем. Кызыт калык хор отделенийын аккомпаниаторжо улам. Институтым тунем пытарыше-влак «Алатырь» лӱман казах муро коллективым чумыреныт. Нунак шке выступленийыштым «Поле чудес» передачышке ончалаш колтеныт. Редактор-влаклан мурымышт келшен да артист-влаклан модаш еҥым кычалаш ойленыт. Нуно мыйым ӱжыныт. Вигак шым келше, а вара шочмо Шернур кундемыш кудалме корнышто шонен каем: «Молан ом кайже?! Пуйто мылам кажне кечын тыгайым темлат, кайыман, марий койышым ончыктыман». Анкетым возышым, мом кузе ышташ шонымашем ончыктышым. Уста кидмастар Сергей Данилов деч тӱмырым нальым, теркупшым муаш Сергей Карпов полшыш.
Малахов деке миен
А тылеч ончыч 41 ияш Александрым Андрей Малаховын «Привет, Андрей» передачыштыже ужна. Тушко Удмуртийыште шочшо да кызыт Озаҥысе тӱвыра институтышто тунемше йолташыже Айдар Апашев дене пырля миен.
Тунам Саша гармоньым устан шоктыш. Ялыште гармонь деч посна неле манме шонымашан мурылан Александр семым шкежак возен. Тиде кокымшо мурылан возымо мелодий. Икымшыжым Озаҥ оласе Советский районышто верланыше Саид-Галиев лӱмеш тӱвыра полатыште улшо Ветеран-влак клубын хорыштлан ала-мыняр ий ончычак келыштарен. Саде мурым ковай-влак гимн семын мурат. Тиде хорыш Озаҥысе оптико-механический заводын ондакысе пашаеҥже-влак коштыт. Тушто А.Славин аккомпаниаторлан пашам ышта.
Тайвань, Китай мартеат шуын
Ондак тудо ятыр ансамбльыште шке мастарлыкшым ончыктен. Марий самырык тукымын «Лай мардеж» ансамбльышкыже лу ий наре коштын. Туддене пырля Эстонийыште да моло вереат лийын. Кокымшо гана ты элыш «Этно Эстония» фольклор музык фестивальыш миен толын.
2018 ийыште Folk-Rok направлений дене пашам ыштыше «Хмельная ворга» дене Китайыште выступатлен. Эше студентше годымак Культур институтын «Сайдаш» куштышо ансамбльже дене Францийыште лийын. Тунам икымше гана Атлантический океаным ужын.
Ондак Лаишево оласе йоча сымыктыш школышто «Баян» специальностьым туныктен, Озаҥысе «Счастливое детство» коллективыште пашам ыштен, Культур институт пеленысе руш фольклорым калык коклаш шарыше «Красная горка» ансамбльыште баяным, гармоньым, балалайкым шоктен, акапельно мурен. «Счастливое детство» йоча ансамбль дене пырля Тайваньышке тӱнямбал фестивальыш баяным шокташ миен. Тушто тунемше-влак тӱрлӧ калык куштымашым ончыктеныт, пырля ик тылзе лийыныт.
А кызыт тӱҥ пашаже – Татарстанысе калык-влакын келшымаш пӧртыштышт йӱк оператор. Тылеч посна землякна марий-влакын «Озаҥ мари» ансамбльже дене тӱрлӧ мероприятийышке ушна. Тудо моткоч шуко семӱзгар дене шоктен мошта: баян, гармонь, балалайке, аккордеон, контрабас, шиялтыш, тӱмыр, шӱвыр, пианино, курай…
– Пытартыш жапыште кавказ гармоньым шокташ тунемынам. Нунын семӱзгарышт изиш вестӱрлырак. Лезгинкым, моло кавказ куштымашым шоктымем шуын. Саде гармоньым налаш иктаж кум ий ончыч Владикавказ шумеш миенам ыле. Туштак преподавательым верештынам да интернет полшымо дене тунемынам, – манеш уста еҥ.
Чапландара
Александр Славин марий калыкым тӱрлӧ вере чапландара. Тудым марий шӱдыр манын кертына. А шочмо Лажъялыштыже тудым Петухов фамилий дене палат. Кызыт тушко Александр арня еда кудалыштеш, чывым онча, пырысшт уло. Шочмо верыште артист ласкалыкым шижеш да вий-куатым пога.
Ты сурт-печыште ондак кум изак-шоляк илен. Но кугурак изаже да ачашт ден авашт ты тӱням коден каеныт. Виталий изаже Йошкар-Олаште ила да сварщиклан пашам ышта.
– Музык деке мыйым Славик чӱчӱэм шӱмаҥден, ачамынат лӱмжӧ – Слава. Тидым шотыш налын, Славин фамилийым налаш шонен пыштенам. Чыла документем почешат Славин улам. Чаманаш гына кодеш, ачам ден чӱчӱэм коленыт, но нуно эре ушышкем толыт, очыни, вес тӱня гыч полшен шогат, – ойла музыканче.
Фото-влакым еш альбом гыч налме.