Кодшо шуматкечын, 20 июньышто, Шернур район Лажъял школым 1976 ийыште тунем пытарыше-влакын, пел курым эртымеке, фестиваль шӱлышан лӱмгече вашлиймаш касышт Лажъял тӱвыра пӧртыштӧ эртаралтын.
Тиде мероприятий кок класслан пӧлеклалтын. Тушто 32 йоча тунемын. Вашлиймашыш выпускник-влак куанен толыныт.
Республикын тӱрлӧ верыштыже илыше да тӱрлӧ профессиян корно дене кайыше-влак мероприятийым, «Выпускникын гимнжым» гитар почеш мурен, нӧлталалтше кумыл дене почыныт. Гимнын мутшымат, семжымат лач тиде пайремлан шкештак келыштарен возеныт, залыште улшо еҥ-влак чыланат пырля йоҥгалтареныт.
Муро йӱк Лаж вӱд эҥер марте кеҥеж пӱртӱсым шыман вӱдылын, шӱм- чоным куандарен. Пайрем касыш шке туныктышыштымат пагален ӱжыныт. Чаманен каласаш логалеш, шукынжо ты тӱня дене шукертак чеверласеныт. Нуно веле огыл, нине классла гыч латкок тунемшат кававомыш гыч йӧным веле ыштен шога.
Розалия Павловна (руш йылмым туныктен) ден Агафон Романович (физикым туныктен) Шубинмытын, тыгак Сергей Петрович Стародубцевын (физкультурым вӱден) ончычсо тунемшышт дене чон почын мутланен, шарналтен да муралтен колтымыштак мом шоген!?
Ош тӱня дене чеверласыше тунемше кокла гыч Анатолий Малинин нерген руш йылмым туныктышо Розалия Павловнан шомакше пырля тунемше-влакын шӱмешышт логалын: «Анатолий – ушан-шотан рвезе, Москвасе инженерный институтым тунем пытарымеке, Йошкар-Оласе совхоз-техникумышто коло утла ий студент-влакым туныктен, илыш корныш лукташ полшен, чаманена, шарнена, вет пелашыже тиде классымак пытарен».
Вашлиймаш фестивальым тыге моторын эртарен колташ шуко вийым да надырым тиде классыште тунемше Игорь Иванович Волков пыштен. Тудак икте-весе коклаште вашкылым ыштен, музыкальный ужашыштат уло чон дене тыршен, пайремнам вӱден, гармоньымат шкеак шоктен, толшо калыкым мурыктен да куштыктен.
Тунемме жапысе оҥай историйым, эпизодым кузе вара тыгай годым шарналташ огыл? Илалше туныктышына-влакын поро сугыньышт ӱмырешлан шӱмеш кодеш.Садлан чыланат тудлан тауштеныт, таза, кужу ӱмыран, пиалан лияш тыланеныт.
Вашлиймаште мый школлан да шарнымашлан пӧлеклалтше почеламутем-влакым йоҥгалтарышым. Нуным чыланат кумылын колыштыныт. А мучаште кажне выпускник шӱм-чонлан келшыше пайремым чумырен кертмылан тауштен.