Тиде иктаж 14 ий ончыч лийын. Мыйын акам тунам 11-ше классыш коштын, а пырля тунемше-шамыч чыланат пошкудо яллаште иленыт. Теве ик ялжым мемнан деч корем ден изирак эҥер ойыра. Эҥерым вончаш кӱвар уло гынат, кече шичме деч вара еҥ-шамыч тушеч пешыжак коштын огытыл, кужурак машина корно дене мӧҥгышт пӧртылыныт.
Ик кастене акам дек рефератым налаш одноклассникше толаш лектын. Корем вуйышто шогышыжла, кӱвар воктене мемнан ял могырым еҥым ужынат, акам шога манын шоналтен. Кӱкшӧ курык гыч куржын волымекыже, саде еҥет ала-кушко йомын. Рвезе мемнан ялна марте толынат, ваштарешыже ошкылшо акам вашлийын да йодын: «Мо тыйже мӧҥгеш ялышкет кӱзенат?» Акам тунам ӧрын шогалын, вет тудо коремыш воленат шуктен огыл. Туге гынат йолташыже мӧҥгеш тиде кӱвар денак шке ялышкыже куржын, лӱдыкшырак лийын гынат, экзаменлан ямдылалташыже кӱлын.
Идалык эртымеке, 1-ше курсышто тунеммышт годым акам тыгак пошкудо ялыш каяш лектын, ваштарешыже йолташыже ошкылын. Эҥерым вончаш толын шумекыже, мемнан ял могырым кӱвар йымалне капюшоным упшал шичше пӧръеҥым ужынат, йолташыже лӱдыктынеже манын шоналтен. Акам тудым лӱмжӧ дене ӱжынат, саде айдеме вуйжым нӧлталын, а шинчаже йошкар тул дене йӱлен! Кузе курыкым куржын кӱзымыжым акам омат шарне манеш, пырля тунемше йолташыже деке миен керылтмекыже веле ушыжо толын, лӱдмыж дене шорташат тӱҥалын. Тылеч вара тудым йолташыже-шамыч кужу корно дене гына налашат толыт, ужатенат кодат ыле.
Кызытат, тынар ий эртымеке, пычкемыш жапыште тиде коремыш волаш огына тошт. Ала тиде «еҥ» алят тушто?
Екатерина.
Морко район.