Апрель тӱҥалтыште Железноводск олаште курыкыш куржын кӱзымӧ дене Российын первенствыже эртаралтын. Йошкар-Оласе Олимпийский резерв училищын воспитанницыже Мария Киселёва тушто икымше лийын.
Ӱдыр Виче кундемысе Кикнур посёлкышто шочын-кушкын. Тысе школышто шинчымашыжым нӧлтен. Вара Йошкар-Оласе Олимпийский резерв училищыш тунемаш пурен.
– Лу ияшем марте музыкальный школышто мастарлыкем таптенам. Но ты направлений утыжым чонем сымыстарен огыл, садлан вес йыжыҥыште шкем кычалаш тӱҥалынам. Пырля тунемше йолташем-влак куштылго атлетике дене спорт секцийыште шуаралтыныт. Садлан мыят нунын деке ушнаш кумылаҥынам. Такшым куржталаш изинек йӧратенам.
Куштылго атлетике спортын ойыртемалтше видшылан шотлалтеш. Ты спорт икмыняр дисциплинылан шелалтеш. Тыгак куржталмаш тугай тӱшкаш пура, кудыж дене шуко еҥ заниматлен кертеш.
Шочмо-кушмо верыштем кажне шошым 10 меҥгым куржталме дене таҥасымаш эртаралтеш. Шарнем, 11 ияшем годым мыят ачам дене тушто вийнам тергенна. Ты кужытым 45 минутышто куржын толынам, – каласкала Маша.
Кызыт спортсменке арняште 12 тренировкым эртара. Тудо Константин Петрович Лукьянов дене моштымашыжым тапта. Маша спорт мастерыш кандидатлык нормативым 2023 ийыште Оренбург олаште эртаралтше Российын первенствыштыже шуктен.
– Идалыклан кок гана Кисловодск олаште сборым эртена. Тӱҥ шотышто кугу старт-влак деч ончыч тушко лектына. Тыгай сбор-влаклан кӧра спортсмен-шамыч кугу опыт дене пойдаралтыт. Садлан нуно моткоч кӱлешан улыт, – манеш тудо.
Шукерте огыл Железноводскышто эртаралтше Российын первенствыштыже М.Киселёва курыкыш куржын кӱзымаште шӧртньӧ медальым сеҥен налын. Тудын ойлымыж почеш, ты медаль карьерыштыже ик эн шергакан.
– Ты таҥасымаш чонышто куаным веле коден. Кеч-могай спортсмен сай лектыш верч тырша, тидлан шуко вий-куатым, ӱнарым пуа. Садлан тыршымем арам огыл лийын, шонем. Кеч соревнований годым игече утыжым куандарен огыл: йӱр йӱрын, куржталме корно чот яклака лийын, – радамла М.Киселёва.
Ӱдырыншуко жапшым тренировко, соревнований, сбор налыт гынат, чон канен эртарыме татлан нимоат огеш шу, манеш. Тыгай йӧн лекме годым тудо йолташыже-шамыч дене вашлиеш, тӱрлӧ тамле кочкышым ямдылкала. Киселёван ончыкылык планыштыже кызытеш тренироватлалтмаш да сай лектыш верч тыршымаш.
М.Киселёван альбомжо гыч налме фото.