Марий Эл Республикын Кугыжаныш Погынжын Председательже Михаил Васютин Курыкмарий район Пайскырык селаште у универсальный спортплощадкым почмаште лийын.
Пайрем Российын Кугыжаныш флагшын кечыж вашеш «Россий флаг дене – спортыш да поро пашашке!» девиз дене эртен. Тушко ял калык, спортсмен, спортын ветеранже-влак да почётан уна-шамыч погыненыт.
Площадке «Спорт России» кугыжаныш программылан кӧра ышталтын. Тидлан 3 млн утла теҥге окса каен, тӱҥ ужашыже республикысе бюджет гыч ойыралтын, негызым верысе бюджетын оксаж дене ямдылыме. Специалист-влак футбол капкам, баскетболлан да волейболлан стойкым, мобильный трибуным вераҥденыт, резине пудырго гыч шартышым келыштарыме.
Михаил Васютин территорий-влакым комплексно вияҥдымын кӱлешлыкше нерген палемден. Паскырык селаште яллам комплексно вияндыме программе почеш паркым тӱзатыме, а Марий Элым Вуйлатыше Юрий Зайцевын темлымыж почеш да Спорт министерствын ушнымыж дене у площадкым ыштыме. Тылеч посна «У школ» проект почеш Пайскырык школым уэмдаш тӱҥалме.
У площадкыште икымше таҥасымаш мини-футбол дене матч лийын. Йоча-влаклан да нунын ача-аваштлан конкурс ден эстафете-влак эртаралтыныт.
