Марий Элысе Кугыжаныш Погынын Председательже Михаил Васютин шке избирательный округышкыжо – Курыкмарий районыш – миен коштын. Тудо муниципалитетым вуйлатыше Евгением Смелов дене пырля Эмӓн, Микрӓк да Пайскырык ял шотан илемлаште лийын, калык дене вашлийын мутланен да соцобъект-влакым ончалын.
Эмӓн ял шотан илемыште (тыште 1424 еҥ ила) инфраструктурым вияҥдыме нерген ойленыт. Ӱмаште чолга еҥ-влакын тыршымыштлан кӧра пеҥгыде коммунальный отходым погаш 21 контейнер площадкым келыштарыме, тудо 732 тӱжем утла теҥгешке шуын. Нырйӓл, Шайыл Пӧртныр, Панькан яллаште да Сумки селаште урем-влакым волгалтарыме. Еҥ-влак валежникым погымо да Эпӓй ялыш газым пуртымо шотышто йодышым тарватеныт. Ты поселенийысе 17 ял кокла гыч тыште гына газ уке. Агросекторлан полшымо нерген посна палемденыт: кум еш еш фермым вияҥдаш субсидийым (13,9 млн наре теҥге) налын, 15 ЛПХ оза-влак пакчасаскам да пареҥгым ончен куштымылан кайыше 7,4 млн утла теҥге роскотым пӧртылтеныт.
Микрӓк ял шотан илем 29 ялым да 2322 еҥым ушен шога. Администрацийым вуйлатыше Анжелика Алиткина ӱмаште ыштыме паша дене палдарен. Умбакыже яллаште уремлам волгалтарат, манын, но Икшӹ Малиновка, Кокшы Малиновка да Рябиновка яллаште рӱдӧ водоснабжений уке, тидыже калыкым чот тургыжландара. 2024 ий майыште суд администрацийлан 2025 ий 21 декабрь марте проектно-сметный документацийым ямдылаш кӱштен. Ты йодышым Михаил Васютин шке тергаш тӱҥалеш, ты проектлан оксам муаш кӱлеш манын палемден.
Тыгак Михаил Васютин Микрӓк тӱвыра пӧртын хореографше Фаина Павловам 60 ияш лӱмгечыж дене саламлен. Шке ял шотан илемыштым тӱзатымашке надырым пыштымылан да мер пашам чолга шуктымылан Председательын тауштымашыжым Эмӓн селан, Чуайсола, Вӹржӹкӓн ялын старостышт Владислав Кузнецовлан, Надежда Зиновьевалан, Эвелина Стратилатовалан, Эмӓн ял шотан илемысе депутат-влак собранийын депутатше Григорий Логиновлан, Микрӓкыште личный подсобный озанлыкым вуйлатыше Сергей Ерошкинлан да ты ял шотан илемыштак волонтер толкыным вуйлатыше Надежда Цендушевалан кучыктен.
Пайскырык ял шотан илемыште Михаил Васютин верысе школым ончал савырнен. Тудым 1968 ийыште чоҥымо, школым вашке «Молодежь и дети» нацпроект почеш капитально олмыкташ тӱҥалыт.
Вашлиймаште М.Васютин тыгак регионысо парламентын 2025 ийысе пашаже, кызыт депутат корпус ончылно шогышо задаче-влак дене палдарен, верысе самоуправлений реформо нерген умылтарен.
Кугыжаныш Погынын колтымо фотожо-влак.
