«Защитники Отечества» фондын Марий Элысе филиалже «СВОих помним» рубрикым шукертак вӱда. Тушто землякна-шамыч спецоперацийыште шуктымо подвигышт, шкешт нерген каласкалат. Ты рубрикын черетан геройжо – Курыкмарий кундемын шочшыжо Андрей Яшмолкин.
Изинек поро да чын
Андрей 1978 ий 1 ноябрьыште Икшӹ Малиновка ялыште шочын-кушкын. Ончыч верысе тӱҥалтыш, вара Кӓтӓ Шошмар тӱҥ ден Микрӓк кыдалаш школлаште шинчымашым поген. Тунеммыж годым рвезе шкенжым ответственно ончыктен. Тудын чолга, шонымашке шуаш тыршыше, ум пален налаш шонышо койыш-шоктышан лиймыжым шукын палемдат. Тыгак Яшмолкин чыла сомылымат ӱшанлын шуктен, маныт. Рвезе школышто тунеммыж годым спорт дене пеҥгыде кылым кучен, шуко жапым тренировко-влаклан ойырен. Тудо футбол, волейбол дене заниматлен. Ача-ава эргыштым кугуракым пагалаш, изиракым чаманаш, еҥ-шамыч деке поро да чын лияш туныктеныт. Тудын изинекак шыҥдарыме койыш-шоктышыжо кугу лиймекыжат палдырнен. Яшмолкин поро кумылан, чын пӧръеҥ лийын.
Школ деч вара Андрей Российысе ДОСААФ-те водительлан тунем лектын. Профессийым налмеке, элнан Вооружённый вийыштыже службым эртен. Пӧртылмеке, Козьмодемьянск оласе портышто пашам ышташ тӱҥалын. Самырык рвезе «Ота 891» буксир-толкачыште матрослан тыршен. Варажым рулевой-мотористлан шинчымашым нӧлтен да Озаҥ оласе судоходный компанийыште паша корныжым шуен.
«Рэмбо»
2022 ийыште А.Яшмолкиным мобилизаций почеш спецоперацийыш призыватленыт. Позывнойжо – Рэмбо. Тушман ваштареш кредалмыж годым лӱддымылыкым да патырлыкым ончыктымыжлан «За храбрость II степени», «За укрепление боевого содружества», «За участие в специальной военной операции на Украине» медаль-влак дене суапландареныт.
Йӧратыме пелаш, сай ача
2025 ий 20 декабрь – Яшмолкинмыт ешыште ойган кече. Ты кечын 1-ше стрелковый батальонын 3-шо гранатомётный отделенийын кугурак наводчикше Андрей Яшмолкинын ӱмыржӧ кӱрылтын.
– Ты ийынак шошым пелашем отпускыш толын ыле. Сусыргымыжлан кӧра мӧҥгӧ колтеныт. Шот дене эмлалтде, парем шуктыдеак сӧйыш каен. Мӧҥгыштӧ лиймыж годым тушто кодшо салтак-шамыч верч эреак азапланен. Шукыштлан самырык ача гай лийынам, манын. Служитлыме отрядыштыже тудым пагаленыт. Кажне салтакын, йолташыжын илыш гыч кайымыжлан тургыжланен.
Андрейым мландымбалне эн сай пӧръеҥлан шотленам да шотлем. Йӧратыме да лишыл еҥем тетла толын огеш ӧндал, кӱлеш шомакым огеш пелеште. Эрге ден ӱдырланна тудо сай ача лийын. Ешнам тӱрлӧ семын куандараш тыршен, вучыдымо сюрприз-влакым ыштылаш йӧратен. Шӱмыштына тудо курымешлан, – каласкала ӱмыр лугыч лийше салтакын пелашыже Татьяна.
Калыкыште ойлат: айдеме тунар ила, кунар тудым шарнат. Герой Андрей Яшмолкиным ешыже, тыгак элна эре шарнаш тӱҥалеш!