Марий Эл Молодёжьын тӱнямбал фестивальын регионысо программыжын маршрутышкыжо пурен.
Тыге 20 гыч 24 сентябрь марте кундемышкына 24 самырык еҥ толын каен. Нуно Эфиопий, Пакистан, Малайзий, Нигерий, Индий, Канада, Вьетнам, Таджикистан, Кыргызстан, Ливан, Аргентина, Корей Республик, Замбий, Туркменистан, Казахстан, Монголий, Йӱдвел Македоний да Бразилий гыч лийыныт.
Тиде событий вашла келшымаште да тӱвыра илышыште кӱлешан ошкыллан шотлалтеш. Уна-шамыч экскурсийыште коштыныт да республикна, тудын ойыртемже, вий-куатше нерген шуко пален налыныт. Чыла тидыже ончыкыжым пырля пашам ышташ тӱҥалаш сай негыз лийшаш.
Уна-влак рӱдоланам ончал савырненыт, этнографийна да илышна нерген тоштерыште умылкаленыт, кидмастар-влакын пашашт дене палыме лийыныт, аралтышым ышташ тунемыныт. Нунылан марий кочкышымат тамлаш йӧным ыштыме, команмелнам кӱэштмым онченыт. Тидлан Медведево районысо Ким ялысе «Уна Кудо» этнопаркыш миен коштыныт, тудо Кудо водыж дене вашлийыныт. Тыштак марий вургемым чиен сниматлалтын кертыныт.
Курыкмарий районыштат лийыныт. Кава йымалысе тоштер мучко коштыныт. Тыште 5 гектар утла кумдыкышто 60 наре тӱрлӧ оралте: кресаньык пӧрт, амбар, апшаткудо, мардежвакш, монча – верланеныт. Курыкмарий-влакын илыш-йӱлашт дене палыме лийыныт. А.В.Муравьев лӱмеш купеч илыш-йӱла тоштерыште XIX курым мучашысе — ХХ курым тӱҥалтышысе илыш дене палыме лийыныт.
Тыгак Марий кугыжаныш университетын да Политехын студентышт-влак дене вашлийыныт. Марий Элысе Келшымашын тӱнямбал клубшо дене вашлийыныт да ончыкылык пашам палемденыт.
Каласыман, тылеч ончыч 11-17 сентябрьыште Екатеринбургышто Молодёжьын тӱнямбал фестивальже эртаралтын. Тушко Марий Эл гыч 27 еҥан делегаций: чолга студент, «Движение Первых» толкынын еҥже, Марий Элыште тунемше йотэлласе студент-шамыч да пашам ыштыше молодёжь – миен коштын.