Марий Элыште «Инфраструктура для жизни» нацпроектын «Формирование комфортной городской среды» федеральный проект почеш 51 объектым ойыраш лукмо. Тышеч икмыняржым 2026 ийыште тӧрлышаш улыт.
Ты марте Марий кундемыште илыше 34 тӱжем наре еҥ посна кумдык верч шке йӱкшым пуэн. 2019 ий годсек ты проект почеш 612 кумдыкым сылныракым ыштыме. Нунын кокла гыч иктыже – Йошкар-Оласе Марий парк.
Кызытеш Йошкар-Олаште эн шукын (7 тӱжем утла еҥ) Никонов площадьым уэмдаш темлат. Кокымшо верыште – йолын коштмо Вантовый кӱвар ден Карл Маркс уремысе 101-ше А ден 103-шо номеран пӧртла воктенысе кумдык. Кумшо верым Машиностроитель уремысе (Садовый гыч Строитель-влак урем марте) чётный велысе тротуарыште асфальтым вашталтымаш налеш. Тидлан 2000 наре еҥ йӱклен.
Волжскышто Вавилов уремысе Йоча поликлинике воктене парковкым да тротуарым уэмдаш 600 наре еҥ кӱлешанлан шотлен. Звениговышто Охотин уремысе 8-ше номеран пӧрт воктене йолын кошташ тошкалтышым ыштымылан утларак еҥ йӱклен. Козьмодемьянскыште шукынжо Йоча усталык пӧрт воктене йолын кошташ йӧнан верым вучат (1200 утла йӱк).
Район ден округлаште кок-кум объект дене темлалтын. Теве Волжский округышто еҥ-шамыч Сеҥымаш аллейын кечывалвел могыржым уэмдаш, Марий Турек посёлкышто Рӱдӧ паркыште музыкальный верым ышташ, Кужэҥер посёлкышто Совхозный уремысе калык коштмо верым тӧрлаш, Медведево посёлкышто Мир уремысе 4-ше ден 6-шо номеран пӧртла воктенысе кумдыкым сылнештараш утларак йӱкым пуэныт.
Йӱклымаш 12 июнь марте шуйна – тидым 14 ияш да тылеч кугурак кажне еҥ ыштен кертеш. Кумдык верч йӱкдам za.gorodsreda.ru платформышто пуаш вашкыза!