Эртыше кечылаште «Авангард» военно-патриотический воспитаний рӱдерыште «МолодЙошка» самырык-влаклан республикысе форум эртаралтын. Мероприятийым пайремлын мучашлымашке Марий Элым Вуйлатыше Юрий Зайцеват миен. Тудо «Росмолодёжь. Гранты» молодёжный проект-влак российысе конкурсышто сеҥыше-шамычлан грантым кучыктен.
– Тендан кокла гыч кажныже – сеҥыше, кажныже – лидер. Те тӱрлӧ аланыште шкендам ончыктеда, чолга улыда. Тендан гай ӱдыр-рвезе-шамыч – волгыдо ончыкылыклан ӱшан. Ончылныда – ятыр паша, задаче-влак кече еда ешаралтыт. Форумын иктешлымашыже – шке вийлан ӱшанымыда, профессионализмда, уш-акылда да ончыко каяш кумылда. Ӱнарда ташлен лектеш, тиде куандара. У проект-влакым, у сеҥымашым тыланем, ончыко гына! – ойлен Вуйлатыше самырык еҥ-шамычлан.
Тений грантым куд еҥлан кучыктеныт: «Навигатор олимпиад» регионысо просветительский форумын проектшылан Владимир Ивановлан, «Паша Тура» регион-влак кокласе карьерный слётын проектшылан Иван Крусановлан, «Фехтмарафон: длинный меч объединяет» проектшылан Никита Логиновлан. Сеҥыше-влак радамыште тыгак – Сергей Михайлов «ЗОЖ-марафон «Волжская тропа здоровья», Никита Носырев «КофеТех для всех» да Алексей Передриенко «Цифровой старт – физический результат» проектышт дене. Чолга рвезе-влаклан чылаже 3 млн наре теҥгеаш грантым пуэныт.
«МолодЙошка» форум республикыштына тений кумшо гана эртаралтын. Тушко 18-35 ияш 200 наре еҥ ушнен. Туныктымо программе теме шот дене ныл ужашлан шелалтын: «Усталык мастерской» (сылнылык аланыште у йӧн-влак дене пайдаланымаш да тӱвыра поянлыкым пагалымаш), «Уремысе культур: спортлан ставке» (таза илыш-йӱлалан кумылаҥдыме), «Медиасфере» (медиааланыште профессионал мастарлыкым таптымаш) да «Служений» (патриотизм, поро кумылым ончыктымо да ончыкылыклан мут кучымо шӱлышым вияҥдымаш).
Мероприятий «Молодёжь и дети» нацпроектлан келшышын эртаралтын.