31 майыште ТАМАК ДЕЧ ПОСНА ЭРТАРЫМЕ ТӰНЯМБАЛ КЕЧЕ палемдалтеш.
Тамакым шупшмым кудалташ шонет? Тугеже специалист-влакын каҥашыштым шотыш нал.
Тидлан лӱмын кечым палемде, тудым иктаж пайрем але лӱмгече дене кылден кертат (шочмо кече але вес событий). Тидеч 2-3 арня ончыч поливитамин-влак да С витаминым йӱаш тӱҥал. Палемдыме жап деч ик кече ончыч молгунамсе деч икмыняр сигаретлан шукырак шупш. Тыге организмыш тамакысе уда компонент утларак логалме дене тамак тамжым йомдара, а организмлан эҥгек ышталтмым сайынрак шижат.
Тамакым шупшмым чарныме деч вара тыгай симптом-влак палдырнен кертыт:
- кумыл вола;
- тургыжланымым шижыда;
- йӱдым шот дене ода мале;
- тӱткылык йомеш;
- шӱм чот кыра, пӱжалтара;
- умша кошка, кокырыкта, логарым чыгылта.
Шарне: тиде жаплан гына. Нине симптом-влакым куштылемдаш никотинан пластырь дене пайдалане але никотинан жвачкым пур, валериане але пустырник настойым йӱ.
Тамакым кудалтыме годым уто нелытым погаш огыл манын:
- кечеш 3-4 гана коч, малаш вочмо деч ончыч ит коч;
- кинде, ложаш гыч ямдылыме моло кочкышым рацион гыч кораҥде;
- ик порций деч утларак кочман огыл;
- тамакым шупшмо шумо годым тудым кампет але вес шере кочкыш дене ит алмаште, олмешышт олма, апельсин, кешыр але кияр утларак пайдале лийыт;
- калорийым пытараш, тургыжланымаш деч утлаш физический упражнений-влакым ыште.
Тамакым кудалтымеке, шукынжо кум тылзыште уэш тӱргаш тӱҥалыт. Тый денет тыге лийын гын, тидлан шкендым ида вурсо. Тамакым шупшмым йӧршеш чарныме деч ончыч ятыр еҥ икмыняр гана тӧчен онча.