Марий Элыште панкратион дене Юл кундем федеральный округын (ПФО) чемпионатше ден первенствыже, тыгак Йоча лигын таҥасымашыже эртаралтыныт.
Тушко Юл кундем округысо регионла гыч чылаже тӱжем утла участник толын. Йоча лигыште 8-13 ияш 379 спортсмен вийжым терген гын, Юл кундем федеральный округысо чемпионат ден первенствыште – шымшӱдӧ утла атлет. Нуно юниор, кугыеҥ да спорт мастер категорийлаште вийыштым тергеныт.
Марий Элын чапшым Советский посёлкысо «Звезда», Йошкар-Оласе «Красный дракон» ден «Рать» спортклуб-влакын, Марий Элысе Олимпийский резерв училищын спортсменже-шамыч араленыт.
Палемдыман, ты мероприятий «Спорт России» кугыжаныш программе почеш эртаралтын. Сеҥыше-влак спортын ты видыштыже Российысе чемпионатыште да первенствыште таҥасаш тӱҥалыт.
Марий Элысе Спорт министерствын сайтше гыч налме фото.