Анатолий Андрианович Шернур районысо Богородский хуторышто (кызыт уке, Мустай сельсоветыш пурен) шочын. Ачаже Андриан Ефимович унтер-офицер, Георгиевский кавалер да Икымше тӱнямбал сарын участникше лийын. Аваже Александра Федоровна 11 йочам ончен куштен да «Ава-героине» лӱм дене палемдалтын.
Кугу Отечественный сар тӱҥалмылан Анатолий Андрианович призыв ийготыш шуын огыл. Шкаланже ийготым ешарен да 17 ияш рвезе военный службыш каен. 1943 ий ноябрьыште тудым Мӱндыр Эрвелыш Амур областьысе Свободный олаш колтеныт, тушто артиллерийский полкышто наводчик специальностьлан тунемын. 1944 ий март гыч 550-ше гаубичный артиллерийский полкышто разведчиклан служитлен, 1944 ий сентябрьыште Владимир олаш 15-ше учебный танк полкыш колтеныт, тушто СУ-76 самоходный артиллерийский установкын орудий командирже лияш ямдылалтын.
1945 ий февральыште действующий армийыште службыжо тӱҥалын. Боевой корныжо сарын ик эн неле тылзылаштыже эртен. Берлин верч кредалмаште лийын. Тудын дивизийже олан эн кӱлешан объектше, тидын шотыштак гестапон да Авиаций министерствын зданийыштым, штурмоватлымаште участвоватлен.
Сеҥымаш деч вара Анатолий Андрианович военный службым умбакыже шуен, 1950 ий октябрьыште сержант званий дене шапашыш лектын.
Сар жарыште лӱддымылыкым, геройлыкым ончыктымыжлан II степенян Отечетвенный сар орден, «За взятие Берлина», «За победу над Германией в Великой Отечественной войне 1941-1945гг» медальла, Жуковын медальже да ятыр юбилейный награде дене палемдалтын. Тыгак Верговный Главнокомандующийын таумутшо дене палемдалтын.
Анатолий Андрианович пелашыже Галина Леонтьевна, тылын труженицыж, дене 74 ий пырля улыт. Нунын кок йочашт, кок уныкашт да кок кугезе уныкашт улыт.
Анатолий Андрианович ийготан гынат, пӱртӱсыштӧ лияш, поҥгым погаш, колым кучаш йӧрата.
Лӱмгече кечын Анатолий Андриановичлан Россий Президент Владимир Путинын, Марий Элым Вуйлатыше Юрий Зайцевын саламлымашыштым да шарнымашан пӧлекым кучыктеныт.
Марий Эл Республикын Паша да социальный аралтыш министерствын материалже почеш ямдылыме.