Россий Социальный фондын Марий Элысе пӧлкажын специалистше-влак шке данный-влак базышт почеш оҥай шымлымашым эртареныт да кундемыштына пенсийым налше-влак коклаште могай лӱман-шамыч чӱчкыдынрак вашлиялтмым рашемденыт.
Тачысе кечылан пӧлкаште пенсийым налше 198 474 еҥ шотлалтеш. Нунын кокла гыч 132 115 еҥ але 67%-ше – ӱдырамаш, 66 359 еҥ але 33% – пӧръеҥ.
Эн кумдан шарлыше ӱдырамаш лӱм – Галина. Пенсийым налше-влак коклаште 11 194 еҥ тыгай лӱман, тидыже ӱдырамаш-влак кокла гыч 8,5% лиеш. Кокымшо верыште Людмила – 7 955 еҥ (6%), кумшо верыште Татьяна – 7 569 еҥ (5,7%). Вера, Надежда, Любовь чапланыше лӱм-влак тыге пайлалтыныт: Надежда – 5 702 еҥ (4,3%), Любовь – 4 391 еҥ (3,3%), Вера – 2 343 еҥ (1,8%).
Пенсионерке-влак коклаште шуэн вашлиялтше лӱман-влакат улыт. Тиде Антуанетта, Аэлита, Дрия, Езук, Идея, Констанция, Лелюфар, Мальвина, Милиция, Олимпиада, Она, Офелия, Революция Мира, Рипсиния, Рэисэ, Советта, Соломонида, Элеканида да Эра.
Пӧръеҥ-влак коклаште Александр лӱман-влак эн шукын улыт –
6 040 пенсионер. Кокымшо верыште Владимир – 5 368 еҥ, кумшо верыште Николай – 4 803 еҥ. А шуэн вашлиялтше лӱм-влак коклаште – Ромео, Ангел, Африкан, Елисей, Сталенид, Ива, Пронас да Рив.
Алиса AI нейросеть дене ыштыме фото.