Звенигово оласе Транспортно-энергетический техникумышто Кугече пайрем вашеш «Постная кухня» фестиваль лийын. Тудо кудымшо гана эртаралтын.
Студент, преподаватель да уна-влак тӱрлӧ кушкылым кучылтын ятыр кочкышым ямдыленыт да чапле ӱстембал сийым погеныт. Участник-влак коклаште ты техникумышто тунемше ден туныктышо-влак деч посна толовой пашаеҥ-влак, Звенигово оласе Николай Чудотворец черке гыч уна-влак, Волжск оласе Строительно-промышленный колледж гыч студент-шамыч лийыныт. Эн изи участник София Дубровина ыле.
Марий кочкышым палемдаш гын, ӱстембалне пареҥге да поҥго дене уржа ложаш гыч подкогыльо, лашка шӱр, кӧршӧкыштӧ поҥго дене пырля тушитлыме пареҥге, ӱяча, шерепӧчыж гыч напитке, вӱдеш шуктымо да кӱэштме мелна, шокшо пареҥге когыльо лийын.
Мероприятий деч вара толшо еҥ-влак тамле кочкышым сийлен ончышт, рецептымат йодыч.
Татьяна Николаева.
Звенигово район, Аркамбал ял.
Техникумын альбомжо гыч налме фото-влак.
