Август мучаш гыч октябрь тӱҥалтыш марте шордо-влакын коштмо жапышт тӱҥалеш, сандене нуно вер гыч верыш поснак чулымын куснылыт, тиде жапыште корнылашкат лектыт.
Мо дене лӱдыкшӧ?
Кугу янлыкын нелытше 300-500 килограммыш шуэш, тыгодым капкыл кужытшо – кок метр наре. Тыгай нелыт дене изи скорость дене кудалше автомашинат сайынак эмганен кертеш. А янлыкын кужу улмыжлан кӧра тудо машинасе ончыл яндаш эн чот логалеш. Шордо кастене, йӱдым, рӱп пычкемыш лиймеке, кунам корно сайын огеш кой, поснак писештеш.
Мом ыштыман?
- Эркынрак кудалман, тидыже йырым-йырысе ситуацийым эскераш йӧным ышта.
- Корно тӱрым эскерыза.
- Ваштареш кудалше машина уке гын, торашке волгалтарыше тулым чӱктыза. Тудо янлыкын шинчаштыже фарын волгалтмыжым ончыкта. Тыге шордым ончылгоч шекланен шуктеда.
Шордым вашлийында гын…
- Сигналым ида пу. Машинан чарга йӱкшӧ янлыкым сырыктен кертеш.
- Эркын скоростьым иземдыза да машинам чарен шогалтыза.
- Шордын корно гыч кайымыжым вучыза. Шарныза, янлык шкетын огыл, а тӱшка дене коштеш. Садлан тудын почеш моло янлык-шамычат лектын кертыт.
Специалист-шамыч водитель-влаклан ты жапыште поснак тӱткӧ лияш темлат. «Ир янлык-влак» знак воктене утларак шекланаш да чодыра кумдыкым кудал эртыме годым писылыкым шотыш налаш кӱлеш. Шарныза, корнышто кудалме годым писылыкым эскерымаш шкендан да янлык-шамычын илышыштым арален кодаш полша.