Юмылан ӱшаныше марий еҥ, шке йодмыжым шукташ манын, Сӱрем кумалмашке кайыквусым, шорыкым конда. Тений Волжский округ Чодраялысе кумалтыште тӱканат, шулдыранат лийын. Шке марий кумылышт дене самырык-влакат кумалаш лектыныт. «Йодмашда шукталтше, перкан лийже!» да онаеҥ-влакын пелештыме моло шомакат ойлалтын.
Такшым Корамас кундемыште «Сӱрем ужатымаш» йӱлам кугуракын жаплат. Тудо тений 17 июльышто эртаралтеш.
«Сӱрем ужатымаш» йӱла лач тиде кундемыште аралалт кодын. «Марий кумалтыш» общиным вуйлатыше Аркадий Фёдоровын ойлымыж почеш,
ты йӱлам кажне ийын шуктат. Онаеҥ-влак пӧртыштӧ погынат, пелештен лекмеке, ял мучко эртат, шып огыл – нунын ошкылмыштым мӱкш ызген кайыме дене таҥастараш лиеш.
Кум еҥ кидешышт куэ, писте да ваштар укшлам кучен шога. Ял покшелне шогышо онапу ончылан (тудым печен ойырымо, кумалтыш кечын капкажым почыт) верысе калык дене пырля кумалтыш эртаралтеш. Онапу йыр калык кум гана савырна. Ты жапыште кондымо кум укш онапу ончылан вераҥдалтеш, а онаеҥ Юмо деч калыклан нине пушеҥге-влак семын пеҥгыде, куатле, виян лияш манын кумалыт.
Шижалтеш, тиде йӱлам калык чот пагала, садланак кажне ийын калык тышке шукак погына. Теве Озаҥ олаште илыше але пашам ыштыше-влакат кугезе йӱлам шукташ ушнат.
Корамас калык ятыр гана кумалеш гын, йӱр тудо кечын толеш манме шоктен. Садланак кажне гана йӱр лиеш мо манын вучат.
Волжский округысо «Марий кумалтыш» общинын фотожо.