Тений 10 апрель гыч Марий кундемыште колым кучымо шотышто у правил лектын.
Марий Элысе Янлык тӱня департамент колым кучымо шотышто кажне ийын шошымсо чарак-влак тӱҥалме нерген увертара. 10 апрель гыч 10 июнь марте Чебоксар водохранилищысе акваторийыште да республикысе кол озанлык значениян чыла вӱд объектыште вӱдысӧ биологический ресурсым кучымо шотышто посна режимым палемдыме.
Ты жапыште чыла гаяк ӱзгар дене колым кучаш жаплан чаралтеш. Лачак сер воктене колызо-шамыч ик колкан але донка маналтше эҥыр дене кучен кертыт – тыгодым ик айдемылан шотлымаште кок крючок деч шуко лийшаш огыл.
Пӱртӱс поянлыкым ончыкылык тукымлан арален кодаш да колым кучымаш сайым гына кондыжо манын, нине правилым шуктыза, палемдат профильный министерствыште.