23 майыште, Российысе калык-влакын икоян улмо идалыкшым шотыш налын, Ленинград областьыште Пеледыш пайремым чуваш-влакын Акатуй пайремышт дене пырля эртареныт.
Тудо ты ганат Всеволожск олан Юбилейный площадьыштыже гӱжлен. Калык-влакын пайремышт олаште илыше ден уна-шамычым марий ден чуваш-влакын тӱвырашт дене палымым ыштен.
Марий-влакын ыштыме фотозонышто шымакшан ӱдырамашым ончыктымо. Ончаш толшо-влакым Катерина Шабдарын Санкт-Петербургышто чумырымо «Югорно» мурышо да куштышо марий ансамбльже, Киров областьысе Кикнур район Какшанмарий селасе тӱвыра пӧртын «Юлавий» ансамбльже, Пошкырт кундем гыч Мишканысе Марий историй да тӱвыра рӱдер пеленысе «МуроЭм» ансамбль (вуйлатышыже – Алексей Ибулаев), Пӱрӧ ола гыч гармоньчо Вадим Байназов да Марий Эл гыч «Марий памаш» ансамбль куандареныт.
Тыгак мастер-класс, кидпаша ончер, спорт таҥасымаш лийыныт. Икманаш, шкешотан пайрем ямлын да моторын эртен.
