Марий Элысе Кугыжаныш Погынын Науко, образований да молодёжный политике шотышто комитетшын заседанийжже эртен.
Тушто Марий Элысе образований отрасльын кадровый системыж шотышто, тыгак Морко район Кокласола лицейлан тӱшкагудым чоҥаш кӱлмӧ нерген каҥашеныт.
Икымше йодыш дене образований министрын алмаштышыже Валентина Гаврилова докладым ыштен. Тудо палемден: 23 сентябрьын данныйже почеш кызытеш общеобразовательный тӧнежлаште 123 вакансий яра. Поснак математикым, физикым, руш йылме ден литературым, йот йылмым, тӱҥалтыш класслам, технолоийым туныктышо-влак кӱлыт.
Тений абитурент-влакымат целевой набор почеш вузлашке шагал налме. Каҥашыме годым депутат-влак целевой тунеммаш шотышто у радам нелылыкым луктеш маныныт. Вет посна специальность дене йодмаш приёмный кампаний деч ик идалык ончыч пуалтеш. Тидыже абитуриент-влак дене пашам ышташ нелемда, вет тунемаш пурымо шотышто пунчалым нуно экзамен деч вара гына луктыт. Комитетым вуйлатыше Григорий Пейсахович целевой тунеммашын механизмжым уэмдаш темлен. Вет тиде йодыш Российысе Минтрудыштат нӧлталалтын, но проблеме кодын да законодательно пеҥгыдемдымым вуча.
А самырык педагог-влаклан республикыштына ешартыш полыш уло: тӱҥалтыш кум ийыште оклад деч 50 проценташ надбавкым тӱлат, илымылан роскотын икмыняр процентшым пӧртылтат, ялысе коэффициентым шотлат, единовременный выплатым тӱлат.
Тыгак Кокласола лицейыште тӱшкагудым чоҥымо йодыш пӱсын шога. Кызыт тушто районла ден олала гыч 99 тунемше тунемеш. Ӱдыр-влак тӱшкагудышто илат гын, рвезе-влак — тошто школын оралтыштыже, эсогыл кок вере. Тидыже илыме условий, кызытсе йодмаш дене келшен ок тол. Кызыт тӱшкагудо шотышто проект ден сметым ыштыме. Ты шотышто йодмашым республикысе финанс министерствыш колташ палемдат, варажым 2027-2029 ийлан планыш пуртынешт. Тыгак вес ийын Кокласола лицейын зданийжым капитально олмыкташ тӱҥалыт. Тидлан 68,7 млн теҥге ойыралтшаш.
Кугыжаныш Погынын Комитетше, идалык мучаш марте Кокласола лицейыш миен, заседанийым эртараш пунчалым луктын.
