17-18 июльышто Козьмодемьянскыште «Васюки фест» сатире да мыскара фестивальыште тӱжем утла Марий Элыште илыше еҥ да уна-шамыч каненыт.
Пайрем «Это вам не Рио – это Васюки» таҥошкылмаш гыч тӱҥалын. Колонным КВН-ысе «Уездный город» команде ончыко вӱден ошкылын. А таҥошкылмашын тӱҥ татшылан Остап Бендер дене вашлиймашым шотлыман. Тыгодым Козьмодемьянск олан мэрже Михаил Козлов лӱмлӧ комбинаторлан ола деч сравочым кучыктен. Фестивальын вес лӱмлӧ унаже Марий Элысе промышленность, ужалымаш да экономике вияҥмаш министр Владимир Халюзин лийын.
Ты фестивальын ик эн сымыстарыше кумдыкшо – гастроплощадке. Тушто регионысо шеф-повар-шамыч тӱрлӧ калык кочкышым уна-влаклан темленыт. Марий калык кочкыш моло калыкын деч нимыняр огеш ойыртемалт, мӧҥгешла, тамле да йодмашан улмыжым пеҥгыдемден.
Пайремыш толшо уна-влаклан поян программым ямдыленыт. Тыште мурымаш, куштымаш, спорт таҥасымаш, модмаш, стендап да молат эртаралтыныт. Тылеч посна йӱлаш пурышо «12 пӱкен» («12 стульев») аукцион лийын. Тудо пытартыш ыр марте торгаяш йӧратыше-влаклан келыштаралтын. Тушко кажне кумылан еҥ ушнен кертын. Правил почеш, эн кугу акым пуышо еҥлан 12 пӱкен гыч иктыжым шканже ойырен налаш пуат. А ик тыгай пӱкеныште бриллиантым шылтат. Ты гана шергакан кӱ 8-ше номеран пӱкеныште лийын. Тудым Виловат села гыч Илья лӱман рвезе 18 тӱжемлан налын.
«Васюки фест» сатире да мыскара фестиваль «Туризм и гостеприимство» нацпроект почеш эртаралтеш. Марий Элысе Правительствын палемдымыж почеш, тыгай сынан мероприятий-влак кундемнан кугу кӱкшытан пайремым, фестивальым эртараш йӧнан улмыжым пеҥгыдемдаш полшат. Ты фестиваль кышкарыште «Актуальность и развитие турмаршрутов в регионе. Вызовы времени» теме почеш каҥашымаш лийын.