Советский район Ӱшнур селаште у тӱвыра пӧртыштӧ лийна. Тудым кодшо ийын республикын шочмо кечынже пайремлын почмо. Ик полатыште тӱвыра пӧрт, книгагудо да верысе администраций верланеныт.
У верыште
Книгагудыш пурен шогалмеке, тудым вуйлатыше марий ӱдырамаш кумылын вашлие. Палыме лийна, Ираида Бирюкова улам мане. Кумылзак койышыжо дене пырля книгагудым чаткан кучымыжо вигак шинчалан пернышт. Тидыжым у да мотор пӧлемым ойырымылан вуйлатышын куанже дене пеҥгыдемдаш лиеш.
– Библиотеке аланыште 20 ий наре пашам ыштем. Ондак тудо школышто верланен ыле. А 2013 ийыште ӧрдыж ялла гыч тунемаш толаш тӱҥалмекышт, тунемше-шамычлан вер ситен огыл. Сандене Советский посёлкысо рӱдӧ книгагудыш кусареныт ыле. Тыге саде жап гыч кодшо ийысе август марте Йоча рӱдӧ библиотекыште да краеведений секторышто пашам ыштенам, – ойла Ираида Ивановна.
Мом лудыт?
Книгагудым ончен куанет: тушто у книга-влакым наледыме. Тидым библиотекарь шкежак ыштен, ойырымо окса дене нуным тӱрлӧ вере заказатлен.
– Могай книга кӱлеш, еҥ-влаклан лудаш мо оҥай – эскеренам да сандене палем. Коллеге-шамыч дечат ой-каҥашым йодынам. Тыге совет да йотэлласе литературымат, классический произведенийламат, фантастике ден приключенийымат – тӱрлӧ сынан книга-шамычым чумырымо. Марий книга издательствышкат миен, шкеак ойырен конденам. Икманаш, марла, рушла, кусарыме у книга-шамычым налын, полкылашке вераҥденна. Историй дене кылдалтше да кызытсе автор-шамычынат савыктыш шагал огыл, – мане библиотекарь.
«Самырык-шамыч мом лудыт?» манын йодмемлан тудо тыге вашештыш:
– Школышто тунемше-влак урок деч вара пурен лектыт, тӱрлӧ ойлымашым лудаш йӧратат. Йоча-шамычлан «Непоседа» да «Кече» журналым налына, кугыеҥ-шамычлан – «Дарья» ден «Ончыкым».
Молодёжь шукерте огыл савыкталтше книгам йодеш. Мутлан, шукынжо Ася Лавриновичын возымыжым налын каят. Самырык писатель утларакше подростко-влаклан йӧратымаш нерген роман-влакым серен.
Кажне арнян – мероприятий
Эрелан келыштарыме выставке «Мой край, мой район, моё село» маналтеш. Лачак тушто книга-шамыч гына вашталт шогат, ешаралтыт. Вес ончер Российысе Калык-влакын икоян улмо идалыклан пӧлеклалтын.
Книгагудыш еҥ-влакым, поснак йоча-шамычым, Ираида Ивановна тӱрлӧ мероприятийыш чумыра. Теве иктыжым 1 апрельыште Кайыкын тӱнямбал кечыжлан келыштарыме лийын. Икшыве-шамычлан библиотекарь викториным эртарен, модыктен, тӱрлӧ калыкын кайык-влак нерген мультфильмыштым ончыктен, варажым тиде темылан мутланеныт.
Космонавтике кечылан И.Бирюкова шке оксаж дене икмыняр у, мотор да оҥай книгам заказатлен. Тушеч Юрий Гагарин нерген икмыняр ойлымашым пырля лудыныт. Тӱвыра пӧртын пашаеҥже Эльвира Таныгина ты кечылан Гарик Кричевскийын мурымо «Поехали» мурым лӱмынак тунемын да йоча-влаклан йоҥгалтарен. Космонавт-влак нерген каласкалымым библиотекарь викторине дене пеҥгыдемден.
Книгагудышто тыршыше еҥ дечат тачысе саман шуко шинчымашым да усталык шӱлышым йодеш. Нуно шке моштымыштым калык коклашке шарышаш улыт. Сандене мийыме кечынат Ӱшнур книгагудышто Советский районысо библиотекарь-влаклан семинар лийын. Тушто икте-весышт дене опытышт дене пайлалтыныт.
Каласыман: Ираида Бирюковат усталык шӱлышан. Марпединститутышто руш йылмым национальный школышто туныктышылан тунем лектын. 2006 ий марте Ӱшнур да Тапшер школлаште тыршен. Кызыт верысе черкылан полшаш кумылан. Тушто мураш мурын шомакшым возен. Ты мурым фестивальышкат луктыныт.
Пелашыж дене кок эргым ончен куштеныт, кызыт коктынат врач улыт. Изирак эргыже гын аважлан ятыр мероприятийыште кугу эҥертыш лийын. Тачат аважлан я книгам заказатла, я моло семын полшенак шога.
