23 августышто Киров олаште «ФормАРТ» урем сымыктыш фестивальым петырыме церемонийыште Юл кундем федеральный округысо эн сай граффити-художник-влакым саламленыт.
Финалын программыже кок направлений: арт-объектым пырля ыштымаш да самырык сӱретче-влакым профессионально вияҥдымаш – гыч шоген. Участник-влак пленэрыште пашам ыштеныт, Киров кундемысе кидпаша дене палыме лийыныт. Тыгак вӱдышӧ эксперт-влакын лекцийыштым колыштыныт. Нунын деч граффитин кузе вашталтымыже, творчествыште нейросетьым кузе чын кучылтмо да стрит-артын оласе дизайнын ужашыже лийме нерген пален налыныт.
Эн сай паша-влакым общественный йӱклымаш почеш палемденыт: экспертный жюри аклен, а еҥ-влак «Госуслуги» порталыште келшыше авторлан йӱкыштым пуэн кертыныт.
Йӱклымаш почеш икымше верыш Татарстан кундеым гыч Александр Попов «Семейные традиции» пашаж дене лектын. Тудо тыгак эн шуко йӱкым поген да «Общественное признание» номинацийыште посна призым налын. Кокымшо верыште – Саратов область гыч Иван Сергеев «Лица одной страны» пашаж дене, кумшо верыште – Угарман кундем гыч Екатерина Парюшкина «Колыбель единого эпоса» пашаж дене.
Фестивальыште сеҥыше да призёр-влаклан творческий пашам вияҥдаш 100 гыч 200 тӱжем теҥге марте грантым кучыктеныт.
Фестивальым петырыме годым вӱдышӧ деч фристайл, куштымаш номер, битбокс да шарнымаш сувенирым сӱретлымаш лийыныт.
«ФормАРТ» фестиваль 2020 ий годсек Россий Президентын Юл кундем федеральный округышто полномочный представительже Игорь Комаровын темлымыж почеш «Молодёжь и дети» нацпроектын полшымыж дене эртаралтеш.