Август мучаште кундемыштына «И КРАТКАЯ» Йошкар-Оласе III кинофестиваль лийын. Тудын кышкарыште тӱрлӧ усталык вашлиймашым, мобильный кинолабораторийым, мастер-классым эртареныт. Иктыже – педагог, режиссёр Альфия Хабиббулинан «Самопробы в кино» мастер-классше.
Мастер-классыш студент, тӱҥалше артист, блогер да молат ушненыт. Нунын коклаште Йошкар-Оласе И.Палантай лӱмеш тӱвыра да сымыктыш колледжын студенткыже Екатерина Мамаева лийын.
Ӱдыр Шернур кудемыште шочын-кушкын. Ончыкылык илышыжым сцене дене кылдаш шона. Шкеж нерген тыгерак каласкалыш:
– Кызыт кумшо курсышто профессионал шинчымашем нӧлтем. Курчак театрын артистше лияш ямдылалтам. Кино да театр артистлан тунемаш пураш шоненам, но тунам тыгай курсыш студент-влакым поген огытыл.
Мыланем ончыкылык профессием моткоч келша. Артист-шамыч тӱрлӧ рольым модыт: ик геройын, весын образыштым чоҥат да геройын шонымашыжым ончышо еҥлан намиен шукташ тыршат. Сцене гоч айдемын тӱрлӧ койышыжым ончыктен моштымашым кугу пашалан шотлем. Садлан тӱрлӧ вере шуаралташ тыршем.
Кино аланыште шкем терген ончаш шонымаш дене Альфия Хабиббулинан мастер-классышкыже ушненам. Тылеч ончыч киношто войзалтме пробым эртыме опытем эше лийын огыл. Мыланем моткоч келшен. Альфия дене пашам ышташ куштылго. Тудо чылажымат сайын да раш умылтара. Профессионалын вий-куатшым, моштымашыжым ме, участник-шамыч, поснак чот шижынна. А тыгай годым пашан лектышыжат эреак куандарыше.
Екатерина тыгак камер ончылно пашам ыштымыж годым тургыжланымыж нерген радамлыш. Содыки театр да кино артист-влакын пашаштышт ойыртем уло, мане.
Ӱдыр тыгак тӱрлӧ муро почеш видеом войзаш ӥӧрата. Шукыж годым камер ончылно – шкежак. Тыгай паша-влакым ик соцкылыштыже вераҥда. Тидат шкешотан вияҥмаш, шуаралтмаш, манеш тудо.
– Мастер-класс шинчымашем сайынак пойдарен манын кертам. Тӱҥ шотышто текстым лудын лекмеке, тудым кузе умылымо, рольлан шкем кузе ямдылыме шотышто умылымашем эшеат пеҥгыдемын. Ончыкыжымат иктаж-могай курсыш але мастер-классыш ушнаш кумыл лектын, – палемда Екатерина.
Самырык ӱдыр-рвезе-шамычлан кызыт чыла вере корным почмо. Мастер-класс, туныктымо курс, форум ден фестиваль-влак… Икманаш, ӧрканыман веле огыл, чылалан тунемаш лиеш. Тугеже, ончыко гына!