Кызыт актрисе Ольга Федотова Марий самырык театрыште ончыктышаш «Король Лир» спектакльыште Лирын кокымшо ӱдыржын, Реганан, рольжым ямдыла. Отрицательный персонаж семын неле шомаклам еҥлан ойлаш полшышо кумылым, чонышто осалрак шонымашым пургед лукташ тунемеш. Ты шотышто шкем дене кучедалме пагытым эртем, манеш.
– Актёр сценыште мастарын модшаш гына огыл, тудо спектакль деч ончыч шкаланже гримым ыштен моштышаш. Ольган тиде поснак сайын лектеш. Шке мастарлыкше дене экскурсийыш толшо йоча-влак денат кумылын пайлалтеш. Тудын кидше дене кӱчык татыште шоҥго кува, мераҥ, пий шочыт. Йоча-влаклан тиде путырак оҥай, – ойла актрисе нерген Марий самырык театрын сылнымут пӧлкажым вуйлатыше Надежда Моисеева.
А могайрак Ольга озавате? Тидын шотышто актрисе икмыняр озаватын образшым чоҥен. Ме кум шочшан ава дене мутланышна, вет тудо ешыжлан тӱрлӧ киндым, печеньым кӱэшт пукша. Тиде пашалан ава пытартыш жапыште утыр кумылаҥын. Эше кокымшо ӱдырыштын глютенан кочкышлан аллергий, а киндым, мутлан, кеч-кӧнат кочмыжо шуэш.
Ольга тӱрлӧ рецепт почеш киндым пышта. Ложаш деч посна.
– Мылам тиде сомыл путырак келшен шинчын. Яшмыкпурса (чечевица) гыч киндым кӱэшт онченам. Кажне гана тӱрлӧ семын ышташ тыршем. Шемшыдаҥ ложашым тидлан лӱмынак налынам. Туддене печеньым, мелнам, когыльым ыштен онченам. Тыге шогылташ мыланем моткочак келша. А сайын кӱзышӧ руашым ончен куанем! Варажым шочыктымо мотор киндем шкемын сымыктыш пашам семынак йӧратен шындем, – каласкала мастар еҥ.
Тиддеч посна актрисылан пидаш келша. Кидыштыже изи чукайже улмо годым Шернур район Мустай ялыште илыше ача-аваж пелен ятыр жапым эртарен. Тунам, диван лукыш пурен шинчын, шарфым, пижым да молымат пидын.
А кузе мотор лияш? – йодым Ольга Федотова деч.
– Тидын ик тӱҥ амалжылан мален теммым шотлем. Тунам коваштына яндар, а шинчаончалтышнат волгыдо лийыт. Чӱчкыдынак кугурак ӱдырем дене оласе мончаш коштына, чурийыш, капыш тӱрлӧ маскым йыгена – уло чон дене канен толына, – вашештыш тудо.
Рецепт
Пушкыдо кинде
Тидлан кӱлыт: 170 г йошкар яшмыкпурса (чечевице), 200 мл кокос шӧр, 2 чывыштыш шинчал, 5 г руашым пушкыдемдышше (разрыхлитель) , ик кочмо совла кунжут нӧшмӧ, 10 мл оливке ӱй.
– Кинде пушкыдо, вӱдыжгӧ да шыдырге коман лиеш, – манеш озавате.– Яшмыкпурса тамыште шижалтеш, но мемнам тиде ок азапландаре. Тиде глютендыме кинде кокла гыч икте веле йочамлан келшен. Садлан молыланат темлем.
Йошкар яшмыкпурсам эн шагалже кок шагатлан нӧртем, но тидым йӱдлан сайрак ышташ. Тылеч вара йогышо вӱд йымалне сайын мушкам да дуршлагыш кышкалам.
Вара яшмыкпурса пелен кокос шӧрым ешарем. Тудым вес кушкыл але тыглай вӱд дене вашталташ лиеш. Блендер дене чыла пырля варем. Руашым пушкыдемдышым але содо ден уксус вартышым ешарем. Умбакыже руашыш оливке ӱйым пыштем да шинчалтем. Чыла пырля лугем. Руаш вишкыдырак лиеш гын, псиллиумым ешарем, тудо лӧча, да руаш пеҥгыдемеш да ик жап гыч овара.
Тиде жапыште кӱэштме формым ямдылем. Тудым пергамент дене шарем. Руашым формыш опталам. Ӱмбакше шонымо семын кунжут нӧшмым шавем.
Духовкым ончылгоч ырыктем да киндым 180° градус шокшышто 50-60 минут кӱэштам.
Еш альбом гыч налме фото-влак.