Йоча лагерьлаште кеҥежымсе тургымлан ямдылалтме пашам шуктат. Каникул жапыште тушто чылаже 26 тӱжем наре икшыве канышаш. Тений Марий Элыште ола деч ӧрдыжтӧ 19 стационарный, 6 палаточный да школ пеленысе 181 лагерь почылтшаш.
Чылаштыжат санитарно-эпидемиологический нормым, лӱдыкшыдымылыкым шуктымым тергыме. Марий Элым Вуйлатыше Ю.Зайцевын кӱштымыж почеш, йоча да оласе инфраструктур лӱдыкшыдымылык, социально кӱлешан объект-влак, икшыван еш-влаклан кеҥеж жаплан каныме верлам тергыме шотышто паша группым ыштыме. Тушко депутат-влак, мер пашаеҥ-шамыч ушненыт.
Тений инфраструктурым саемдыме сомылымат шуктат. «Единый Россий» калык программе почеш «Радужный» лагерьыште кочмывер ден медпунктым олмыктымо. «Сосновая роща» лагерьыште кок корпусым вашке нӧлтен шуктат.
– Ӱдыр-рвезе-шамычлан каникул годым сайын каналташ, вийым погаш, у йолташ-влакым муаш тыланем. А мемнан задачына – йоча-шамычын канышыштым йӧнаным, шарналт кодшым да лӱдыкшыдымым ышташ, – палемден Ю.Зайцев.