15-16 майыште Марий Элыште студент-влакын «Финн-угор калык-влакын поянлыкышт» форумышт 13-шо гана эртаралтын. Тушко Коми, Карелий, Мордовий, Удмуртий да Марий Эл республикла гыч ӱдыр-рвезе-влак толыныт ыле.
Тений тудо Российысе калык-влакын икоян улмо идалыклан да Российысе парламентаризмлан 120 ий теммылан пӧлеклалтын.
Пленарный заседанийлан верым Марий Элысе Конгресс-влак полатыште ойырымо. Тушко пурен шичме деч ончыч полат ончылно Марий Элысе самырык ӱдыр-рвезе-влак тӱрлӧ калыкын куштымашым ончыктеныт. Нуно руш да марий мурсем почеш лывыргын кушталтеныт. А вара уна ден участник-влак хороводыш тӱшкан шогалыныт, марлат тавалтеныт.
Форумым пайремлын почмаште Марий Эл Кугыжаныш Погынын Председательже Михаил Васютин, Марий Эл Правительстве Председательын алмаштышыже – тӱвыра, печать да калык-влакын пашашт шотышто министр Константин Иванов, МарГУ-н ректоржо Михаил Швецов саламленыт, флешмобышкат ушненыт, фойесе выставкым онченыт.
М.Васютин МарГУ-н марий тӱр, сымыктыш, кидпаша дене кылдалтше ончержым мокталтен, финн-угор калыкын ончыкылыкшо волгыдо лийшаш манын пеҥгыдемден.
Варажым толшо-влак форум участник-влакын ямдылыме йылме-влак цифровизаций, киберволонтерстве, калыкын тӱвыра поянлыкшым аралыме нерген докладым колыштыныт. Тушто самырык тукымын кызытсе жапыште йылмым, тӱвырам аралыме, поянлыкнам кумдан кучылтмо шотышто могай мероприятийлаш да кузе ушнымыж нерген радамлыме.
Марий Элысе Кугыжаныш Погынын аппаратшым вуйлатыше Сергей Смышляев ондак да кызыт этнокультур шотышто лукмо закон-влакым таҥастарен ойлен.
Кечывал деч вара 10 секций пашам ыштен. А кастене участник-влаклан «Йӱдымсӧ Йошкар-Ола» экскурсий темлалтын. Кокымшо кечын участник-влак Морко район Унчо селаш миен толыныт.
Максим Алгайкин, Российысе АФУН-ын Молодёжный советшым вуйлатыше:
– Марий кундемна форумын участникше-влакым шокшын вашлие. Форум финн-угор калык-влакын тӱвырашт, йылмышт, йӱлашт вияҥ толмыштым эше ик гана пеҥгыдемдыш. Программын кугу ужашыже самырык тукымлан пӧлеклалтын ыле. Вет лач нунылан поянлыкнам пойдарыман да шуйыман, а форум опыт дене пайлалташ, шке проектла нерген каласкалаш да икоян улмым шижаш полша.
Форумышто Российысе финн-угор калык-влакын ассоциацийыштын Молодёжный советшын еҥже-влак лийыныт. Тидыже Советын шке пашажым чолган шуктымыжо, активист-шамычым шке йыр чумырымыжо да финн-угор тӱвырам арален кодымо верч тыршымыж нерген ойла.
Кокымшо кечын ойыртемалтше верыш, Морко район Унчо кундемыш, мийыме кугун шарналтеш, вет лач тушто калык йӱлам да кугезе-влак дене кылым шижынна. Кугыжаныш Погынлан да университетлан мероприятийым оҥайын эртарымыштлан кугу таум каласем.
