Волжский район Эҥерӱмбал ялыште шочын-кушшо Анна Иванова, икмыняр ий тора кундемыште илымеке, умылен: шочмо кундем деч шерге да лишыл вер тӱняште уке. Кызыт Анна Приволжский посёлкышто ешыж дене ила, верысе йочасадыште пашам ышта.
Тора йӱдвелыш да мӧҥгеш
– Школ деч вара Йошкар-Оласе Тӱвыра да сымыктыш колледжыш тунемаш пурышым – «Народно-хоровое творчество» специальностьлан. Такшым изинек сценыште выступатленам, манаш лиеш. Ачам ден авам фермыште пашам ыштеныт, но коктынат усталык шӱлышан улыт. Самырыкышт годым нуным ялысе клубыш чӱчкыдын выступатлаш ӱжыныт, ешгеат сценыш лектынна. А мый ешыште пытартыш, кудымшо, икшыве улам, садлан азамак эре пеленышт нумалыштыныт. Но акам-изам-влак кокла гыч тӱвыра аланыште мый гына тыршем, – палдара А.Иванова.
Колледж деч вара ӱдыр Карай ялысе рӱдӧ тӱвыра пӧртыш пашаш пурен – тусо театрын художественный вуйлатышыже лийын. Вара, культур дене кылым кӱрлаш шонен, Волжс оласе ик заводыш пашаш каен. А 2015 ийыште Приволжский посёлкысо йочасадыш пашаш пурен. Ныл ий гыч ХМАО-со Сургут олаш каен – ончыкылык пелашыж дене пырля.
– Тусо марий ушемыште тӱрлӧ сомылым шуктенам, ятыр мероприятийыш ушненам. Икымше йочана шочмеке, 2021 ийыште, уэш Марий Элыш пӧртылынна. Кокымшо икшывына дене декрет отпуск деч вара йочасадыш пашаш лектым. Приволжский посёлкышто пачерым 2023 ийыште налынна, кызыт тушто илена. Пелашем дене ынде кум шочшан ача-ава улына. Верысе йочасадыштак музыкальный руководительлан тыршем. Южгунам воспитательым алмаштем.
Ончыч йоча-влак тыглайла чучыныт, колыштыныт, ужын ыштеныт. А кызыт нуным иктаж-мо шотышто шонымашым луктын ойлаш тараташ пеш неле. Но ме, педагог-влак, илыш дене тӧр каяш тыршена. Йоча-шамычым сымыстараш тӱрлӧ методике дене пайдаланена, – каласкала Анна.
Кеҥежым Анна тамада семын пайремлаште пашам ышта. Палымышт-влак шочмо кечым але лӱмгечым эртараш чӱчкыдын ӱжыт, Волжский районышто ятыр пайрем-влакым ямдыла: сценарийым воза, моло сомылат – тудын ӱмбалне.
Икте-весылан полшен
Сергей – водитель, тора рейсыш кугу машина дене кудалыштеш. Анна ден Сергей йолташыштын сӱаныштышт палыме лийыныт. Ӱдыр тушто тамада семын пайремым эртарен, а рвезылан Анна тунар чот келшен, шинчажым кораҥдыде ончен шинчен. Тыге водитель шке «илыш маршрутшым» ойырен налын, а йочасадысе музыкальный руководитель «йӧратымаш семым» муын.
Ивановмытын кугурак Кира ӱдырыштлан – куд ий, Тимур кок ийлан изирак, Ростислав изаж деч вара кок ий гыч шочын. Кира ден Ростислав койышышт дене аваштым поктеныт гын, Тимур – чылт ачаже.
– Пелашем усталык шӱлышан огыл гынат, пашаштем эре полша. Кумшо икшыве дене декрет деч вара пашаш лекмекем, Сергей ургымо машинкым пӧлеклен. Ынде йочасадыш коштшо икшыве-шамычлан костюм-влакым шке ямдылем. Казахский папахым эн ончыч ургенам. Вара Ӱярня пайремлан ямдылалташ тӱҥалынна – имньым шке ыштенам. Татар калык вургемымат келыштаренам, – манеш самырык ава да пелаш.
Мелна пуш, еш каныш
Ивановмыт вич пачашан пӧртысӧ пачерыште илат, воктене сад-пакчашт уке, садлан ача-аваштын суртышкышт чӱчкыдын кудалыштыт. Но ончыкыжым шке пӧртан да пакчан лияш шонымаш шукталтеш манын ӱшанат.
– Ешыштына кок йӱла эреак шукталтеш. Пелашем паша гыч пӧртылмыж кечын кухньышто – эре мелна пуш. Тиде – чон-шокшын символжо, еш эҥертышна мӧҥгыштӧ, тудым ме эре вучена да пырля лиймылан куанена манмым ончыкта.
Кокымшыжо – еш каныш. Кажне кеҥежым пӱртӱсыш палатке дене малымыла лектына. Кастене тулото воктене мый гитарым шоктем, мурем, а пелашем йоча-влакым туристический наукылан туныкта, – палдара Анна.
Еш илышыште тӱҥжӧ – йӧратымаш, тиддеч посна ок лий, манеш самырык ава. Икте-весым пагален, икте-весылан ӱшанен, Сергей ден Анна пиалан еш илышым чоҥат. Шукырак жапым пырля эртараш тыршат, тӱрлӧ сомылланат пырля пижыт. Тыге изижат-кугужат моштымашыжым ончыкта да кӱлешлыкшым шижеш.
Еш альбом гыч налме фото-влак.