Тыге шона курыкмарий мурызо Лидия Кучера. Тудо марий эстрадын сценышкыже икымше гана 1999 ийыште лектын – «Мыры» курыкмарий муро фестиваль-конкурсышто мастарлыкшым ончыктен.
Семмастар, яндар йӱкан еш
Мурызо Курыкмарий район Сухин ялыште шочын-кушкын. Кум классым тысе тӱҥалтыш школышто тунемын. Умбакыже шинчымашым Когосола кыдалаш школышто налын.
– Кандашымше класс деч вара Йошкар-Оласе Палантай лӱмеш музык училищыш дирижёрско-хоровой пӧлкаш тунемаш пуренам. Вич ий училищын хорыштыжо муренам.
Музыкальный ешыште кушкынам. Сандене сымыктыш, тӱвыра, музык тӱня деке йӧратымаш – мыйын вӱрыштак. Ачамын могырым Акулина ковам уста кӱслезе лийын. Тудо мыйымат ты семӱзгарым шокташ туныктынеже ыле, чаманен каласыман, шуктен огыл. Авамын могырым Катерина ковам яндар йӱкан лийын.
Ачам Юрий Сергеевич гармоньым шоктен. Баритон йӱкшӧ дене мурым муралтымыжым шулен колыштынам. Кандаш ий ончыч тудо колен. Ӱшанем, ачам волгыдо тӱняште, суапыште. А Фомаида Григорьевна авам ныжылге йӱкан, марий калык мурым шуко пала. Тудо шочмо ялыштак ила, – каласкала Лидия Кучера.
Курыкмарий мурызо ынде ятыр ий Нижний Новгород олаште ила.
Лидия Кучера тӱрлӧ ийлаште тӱрлӧ пашам ыштен. Пелашыж дене 16 ий пырля илымеке, ойырленыт. Эрге ден ӱдыржӧ уло. Эргыже – интернет-маркетолог, а ӱдыржӧ – бизнес-аналитик.
Шочмо йылме деч ямлыже нимо уке
Лилия эн чот марий мурым мураш йӧрата. Тудо манеш:
– Шочмо йылмем дене мурым муралтем да шке илыш умылымашем, шочмо мландын ойыртемалтше культурыж деке йӧратымашем ончыктем. Марий тӱвырана поян. А курыкмарий калык мурын посна ямже, сынже улыт. Мемнан тукымнан чонжын ужашыже калык мурышто аралалтын да мыланна пӧлек семын пуалтын. Нунын илышышт, пӱрымашышт, чон шижмашышт мурышто кодын. Чылажат келге шонымашан, сылне улыт. Но эн йӧратыме калык муро мыланем «Яратымем». Тудым 2001 ийыште студийыште возенам.
Л.Кучералан София Ротарун творчествыже чонжылан лишыл. 10 ияшыж годым ялысе клубышто ик газетыште С.Ротару нерген статьям лудын да ты мурызын усталыкшым йӧратен шынден.
– Ротару – молдаван, украин да руш калык муро-влакым йоҥгалтарыше мурызо. Йӱкшӧ мотор тембран. Шкежат чевер ӱдырамаш. Адакшым тудын уло йоча пагытше ялыште эртен. Чыла тиде тудын поклонник-влак радамыш шогалаш амалым ыштен, – ойла марий мурызо.
Кызыт Лидия Кучера у муро-влакым калык ончыко лукташ шона. Михаил Толстов дене дуэт лийшаш. Тылеч посна Игорь Ванюковын мурыж дене паша ышталтеш. Ӱшанена, лишыл жапыште чыла шонымаш шукталтеш да марий радиона, тӱрлӧ музык платформо эше ик мотор курыкмарий мурылан ешаралтеш.
Блиц
Йӧратыме пеледыш – ош роза, сирень.
Йӧратыме книга – Александр Пушкинын «Евгений Онегин» романже.
Йӧратыме кочкыш – лӓшкӓ шӱр.
Девиз – «Илыш мотор».
Мо тендан илышдам кажне кечын пиаланым ышта? – лишыл еҥ-влак.