Тений Марий Элыште «Земский работник культуры» программыш ушнышо-влак кокла гыч 20 сеҥышым ойыреныт.
Тӱвыра аланын специалистше-влак 50 тӱжем марте еҥан посёлкылаште, яллаште, селалаште пашам ышташ тӱҥалыт да 1 миллион теҥге единовременный выплатым налыт. Мо сайже: тений районлаш пашаш толшо тӱвыра пашаеҥ-влаклан илыме йодышым шотыш кондаш полшат, ешартыш льготым пуат.
2026 ийыште программыш ушнаш чылаже 32 йодмаш пурен. Сеҥыше-влак радамыш самырык марий ӱдыр Диана Никифорова логалын. Тудо Советский посёлкысо йоча сымыктыш школышто хореографлан ышта.
Тӱвыра аланыш корно
Советский посёлкышто шочын-кушшо Диана изинек чолга лийын. Тудын кап лывыргылыкшым, артист койышыжым йочасадыште воспитательницыже шекланен да ӱдырын ача-аважлан Дианам хореографийыш пуаш темлен.
– Йоча сымыктыш школыш куштымаш классыш индеш ий коштынам. А вара Палантай лӱмеш тӱвыра да сымыктыш коллледжыш хореографический любительский коллективым вуйлатыше, педагог специальностьлан тунемаш пуренам. А тений ты специальность денак МарГУ-што кӱшыл образованийым налынам, – ойла Д.Никифорова.
Диана мастарлыкшым тӱрлӧ жапыште тӱрлӧ коллективыште ончыктен. Колледжыште тунеммыж годым «Вдохновение» ансамбльыште, Т.Дмитриева лӱмеш «Эрвел марий» мурымаш да куштымаш калык коллективыште куштен. МарГУ-што шинчымашым погымо годым «Цармис» куштымаш театрын да «Салика» ансамбльын чолга участницыже лийын. Калык куштымаш-влак, поснак марий куштымаш, ӱдырым усталыклан кумылаҥдат, чонжылан лишылрак улыт.
Йӧратыме школышто тунемше огыл, а туныктышо
Самырык куштызо МарГУ-што тунеммаш деч посна Советский посёлкысо шочмо йоча сымыктыш школышто изирак ставкыште хореографлан пашам ыштен. Тушто паша опытым поген, куштызо да туныктышо мастарлыкшым таптен. Школ директор Галина Николаевна Рябчикова ӱдырлан «Земский работник культуры» программыш ушнаш темлен. Диана тиде конкурсыш ушнаш изиш лӱдын ыле, содыки шукертак олаште ила да олаштак пашам ышташ шонен. Советский посёлко Йошкар-Ола деч тора огыл, паша опытшат ик ийыш шуын, адакшым тушто ешыже ила, тугеже молан торешланаш.
– Пашамым йӧратем, содыки тидлан ятыр ий тунемынам. Йоча сымыктыш школысо «Жемчужинка» ансамбль дене пырля педагог, постановщик семын икмыняр конкурслаште лийынам. Шкемын коллективем але уке. Опытым поген, ончыкшым ансамбльым чумыраш шонем, – палдарыш педагог-хореограф.