Эртыше каныш кечылаште ЙошкарОлаште «Калык вургем пайрем унала ӱжеш» регион-влак кокласе фестивальконкурс мастар еҥ ден модельер-влакым 13-шо гана чумырен.
Тушко Марий Элысе Морко, Звенигово да Курыкмарий районла, Йошкар-Ола, тыгак Татарстан, Пошкырт, Пермь кундемла да Ленинград область гыч 80 утла мастар ушнен. Нуно кум номинацийыште национальный тӱсан 19 вургем коллекцийым ончыктеныт.
Пайрем «Финн-угор транзит» тӱнямбал сымыктыш да калык усталык фестиваль кышкарыште эртен. Тудо 23-26 октябрьыште Йошкар-Олаште тӱрлӧ регион гыч унам иквереш чумырен. Ныл кече жапыште марий рӱдолана Российысе финн-угор калыкшамычын йӱлаш пурышо тӱвыраштым чумырымо рӱдер лийын. Фестиваль культурнообразовательный программе дене почылтын. В.М.Васильев лӱмеш МарНИИЯЛИ-ште палыме этнограф Тамара Лаврентьевна Молотован (1956-2025) 70 ияш лӱмгечыжлан пӧлеклалтше «Этнологические исследования в Республике Марий Эл: история и новации» конференций эртен. Кастене Молодёжный Советын экспертше да фестивальын участникше-влаклан оҥай «Марий кас» лийын. Вес кечынже тӱрлӧ площадкыште паша вашлиймаш, просветительский программе, пресс-конференций, музыкально-литературный лабораторий да молат эртаралтыныт.
1 гыч 4 ноябрь марте фестиваль Карелий Республикыште эрта.

«Калык вургем пайрем унала ӱжеш» конкурс Марий Элыште 2002 ийыште шочын да кок ийлан ик гана эртаралтеш. Тӱрлӧ кундемысе вургем ойыртемым ончыктышо пайрем ондак фестиваль семын эртаралтын гын, 2013 ий гыч конкурс семын участниквлакым пога.
Ты усталык событий национальный костюмым арален кодаш, кидмастар-влакын пашаштым калыкыш лукташ, акрет годсо тӱрым тачысе илышыште кучылтмым ончыкташ эртаралтеш.
Сценыште тӱрлӧ калыкын йӱлаже ылыжын: калык вургемын аутентичный да кызытсе образше-влак, тушто калыкын шкешотан улмыжо, мастарлыкше да чонжо аралалт кодыныт. Кажне вургем але арвер шке кундемын тӱвыраже да историйже нерген каласкален.
Марий Элыште Калык вургем кечым 16 майыште, Тамара Лаврентьевна Молотован шочмо кечынже, эртараш палемдыме.
Шуматкечын, 24 октябрьыште, Калыкле сымыктыш гимназийыште конкурс показ-влак лийыныт. Галаконцерт да участник-влакым суапландарыме церемоний рушарнян, 25 октябрьыште, Я.Эшпай лӱмеш Марий кугыжаныш филармонийыште лийын. Тушко Марий Эл Правительстве Председательын алмаштышыже – тӱвыра, печать да калык-влакын пашашт шотышто министр Константин Иванов миен да ты фестиваль-конкурсын кӱлешлыкшым палемден.
Программе кызытсе модельер ден мастар-влак дене палымым ыштен. Нуно пытартыш кок ийыште ыштыме калык вургемын эн сай коллекцийыжым ончыктеныт. Ончаш толшо-влак тыгак «Кид дене ыштыме калык вургеман курчак» ончер дене палыме лийын кертыныт.
Финалышке 9 номерым луктыныт. Нуным гала-концертыште ончыктеныт.
«Этнографический костюмын репликыже» номинаций:
- 1-ше вер – Звенигово оласе Калык кидмастар пӧрт, автор – Надежда Майкова;
- 2-шо вер – Ленинград кундем, автор – Юрий Брутов;
- 3-шо вер – Пошкырт калык костюмын «Селтэр» калык студийже, вуйлатыше – Фатима Хайретдинова.
«Сценический костюм» номинаций:
- 1-ше вер – Курыкмарий район Йоласал селасе Тӱвыра да ремесла пӧрт, автор – Нина Тятюкова;
- 2-шо вер – Татарстан Республик, Одо кундем костюм, автор – Валентина Билык;
- 3-шо вер – Курыкмарий район Йоласал селасе Тӱвыра да ремесла пӧрт, автор – София Крючкова.
«Кызытсе жаплан келыштарыме авторский костюм» номинаций:
- 1-ше вер – Йошкар-Ола, автор-влак – Роман Акиев, Леонид Ятманов;
- 2-шо вер – Татарстан Республик, автор – Марина Ахмадуллова;
- 3-шо вер – Морко район Чодыраял, «Тӱрлемӱдыр» калык студий.
«Кид дене ыштыме калык вургеман курчак» ончерыште Виче кундем Малмыж ола гыч Н.Магадиева лауреатын 1-ше степенян
дипломжым налын.
Тыгак жюри Надежда Акиевалан спецпризым кучыктен.
Калык вургем пайрем уэш ончыктен: йӱла тиде эртыше жап огыл, а кызытсе жап, тудо тукым ден калык-влакым уша. Айста шке калык костюмнам йӧратен чиена.

Пайрем «Финн-угор транзит» тӱнямбал сымыктыш да калык усталык фестиваль кышкарыште эртен. Тудо 23-26 октябрьыште Йошкар-Олаште тӱрлӧ регион гыч унам иквереш чумырен. Ныл кече жапыште марий рӱдолана Российысе финн-угор калыкшамычын йӱлаш пурышо тӱвыраштым чумырымо рӱдер лийын. Фестиваль культурнообразовательный программе дене почылтын. В.М.Васильев лӱмеш МарНИИЯЛИ-ште палыме этнограф Тамара Лаврентьевна Молотован (1956-2025) 70 ияш лӱмгечыжлан пӧлеклалтше «Этнологические исследования в Республике Марий Эл: история и новации» конференций эртен. Кастене Молодёжный Советын экспертше да фестивальын участникше-влаклан оҥай «Марий кас» лийын. Вес кечынже тӱрлӧ площадкыште паша вашлиймаш, просветительский программе, пресс-конференций, музыкально-литературный лабораторий да молат эртаралтыныт.