19 майыште Оршанке район Отар ялысе пӱяште акак-шӱжар (2014 ийыште да 2020 ийыште шочшо-влак) вӱдыш пуреҥгаеныт. Туткар нерген Россий МЧС-ын Марий Элысе тӱҥ управленийже палдарен.
Туткарыш логалше-влаклан полшаш шонышо- шамыч 112 дене йыҥгыртен кертыт.
МЧС ушештара, йӱштылмӧ тургым 1 июньышто гына тӱҥалеш. Вӱд эше юалге: йӱштылаш пурымо годым шӧн шупшын, шӱм шогалын кертеш. Йоча да подростко-влак йӱштылмышт годым туткарыш ынышт логал манын, теве мом шотыш налаш темлалтеш.
Пляжыште веле
- Йӱштылмӧ верым ойырымо деч ончыч тушто утарыше-влакын улмыштым але укештым шотыш налман. Тидлан йӱштылаш лӱмын келыштарыме верым але пляжым веле кычалман.
- Пляжыште утарыше-шамыч уке улыт гын, вӱд пундашыште пушеҥге вож, янда пудырго да моло лӱдыкшӧ арвер-влак уке улман, пеҥгыдемдалт шичше ошман пӱям але ерым ойырыман.
- Вӱдыш эркын, ласкан пурыман. Тушто лӱмын келыштарыме вер уке гын, тӧрштылман огыл.
- Кече йымалне ятыр жапым эртарыме деч вара вӱдыш вигак пураш але тӧрштылаш огеш лий.
- Вӱд йогыныш логалында гын, шке семын тудын ваштареш «кучедалаш» ида тырше. Йогын почеш, капым изишак савыртен, эркын сер воктеке ийман.
- Вӱдпӧрдем авырен гын, шкендам кучыза. Кугунрак шӱлалтен, вӱд йымаке пурыза да ӧрдыжкырак ийын лекса.
- Эртен кайыше судно деке чак ийын мийыман огыл. Иктаж-мо нерген шижтарыше технический знакым ужында гын, тушко ида кӱзӧ.
- Вӱд воктене утыждене кылмаш але ыраш огеш темлалт. Вӱдысӧ температур 18 градус, южысо 22 градус деч изирак гын, йӱштылаш ида пуро.
- Кочмо деч вара 1,5 – 2 шагат эртымеке веле вӱдыштӧ йӱштылза.
Пуреҥгаен гын…
- Пуреҥгаяш тӱҥалше еҥлан шкендам руалтен кучаш ида пу. Тудым шупшмыда годым вуйжо вӱд ӱмбалне лиймым эреак эскерыза.
- Пуреҥгайыше еҥым вуйжо але ӱпшӧ, коҥлайымалже гыч кучен, сер велке ийза.
- Утарымаште тӱҥжӧ – писылык, тыгак пуреҥгайыше еҥын умша ден нерже вӱд ӱмбалне лийшаш улыт.
Шканет шке полшо
- Вӱдыштӧ ийын ноенат гын, тупыш возын, вийым пого.
- Капкылым «поплавок» семын тыртыштен каналте.
- Йолым шӧн шупшын гын, йолысо кугуварням кучен, шке велке чот шупшылман. Вара, вӱд йымаке вуй дене пурен, тудым турамдыман.
Пале
- Кугыеҥ-влак дене пырля йӱштыл.
- Вӱдыш пуреҥгаен кертме верыште (тура серыште, пристаньыште, кӱвар тӱрыштӧ) ит шого да ит мод.
- Катер, пуш, салке, пуэн овартыме матрас дене ийме годым лӱдыкшым луктын кертше модмашым ит тарвате.
- Ийын от мошто гын, сер деч тораште ит йӱштыл.
- Палыдыме верыште вӱд йымаке ит пуро.
- Утарыше арвер йымаке ийын ит кай.
- Вӱдыштӧ модмо годым икте-весым вӱд йымаке ит шӱкедыл, ит шупш.
- Пуэн овартыме арвер дене сер деч торашке ит ий.
- Пушышто улмет годым ик тӱр гыч весыш ит кошт.
Россий МЧС-ын Марий Элысе тӱҥ управленийже кугыеҥ-влаклан поснак тӱткӧ лияш темла. Йӱштылмӧ тургымышто йоча да подростко-шамычлан кушто да могай вӱдыш пураш лийме шотышто кӱшнырак палемдыме правил-влакым ушештаренак шогыман.
Шарне: вӱдыштӧ шкем айда-лийже кучымаш да правилым палыдымаш кугу эҥгек марте шуктен кертыт. Садлан илышетым арале.