Кугыжаныш Погынын депутатше, Марий Эл Республикысе профсоюз организаций-влакын ушемыштын председательже Александр Майоров «Единый Россий» партийлан ончылгоч йӱклаш документым пуэн. Процедур Кугыжаныш Думыш шушаш сайлымаште партий деч кандидат-влакым рашемда.
Александр Майоровын пашаже ятыр ий республикыштына илыше-влакын интересыштым да пашазе-влакын праваштым аралыме дене кылдалтын. Авторитетын кӱлешан показательже – регионысо профсоюз ушемын вуйлатышыжлан угыч сайлымаш.
Пашаштыже Александр Майоров шкенжым ӱшанлын ончыктен: тудо паша ӱчашымашым решатлымаште лийын, паша условийым саемдымашке шуын да тӱрлӧ отрасльысе пашаеҥ-влаклан социальный гарантийым арален.
