16 майыште элыштына «Тоштер-влакын йӱдышт» Всероссийский акций эрта. Тушко республикысе шуко тоштер ушнаш кумылым ончыктен.
Тенийысе акцийын темыже – «Родное». Тудо Россий калык-влакын икоян улмо идалыклан пӧлеклалтын. Тӱҥ шотышто историй, йӱла, тӱвыра нерген радамлаш палемдыме. Ты кечын кастене элысе тоштер, галерей, тӱвыра тӧнеж-шамыч палемдыме теме почеш еҥ-влаклан экскурсийым, мастер-классым, интерактивный программым эртарат. Тоштер-влак йӱдымат пашам ыштат. Садлан могай тоштерыш кайынеда – ончылгоч шоналтыман да тудын программыж нерген сайтыштышт ончыман.