Марий Эл Республикысе профессиональный шинчымашым пуышо организацийласе студент-влак да школьник-шамыч «Ледокол знаний» тӱнямбал научно-просветительский проектыш ушнен кертыт.
Россий калык-влак икоян улмо идалыкыште Йӱдвел полюсыш экспедицийыш элнан чыла кандаш федеральный округ гыч ӱдыр-рвезе-шамыч каят.
Конкурсышто 14-16 ияш-шамыч шкеныштым терген кертыт. Отборыш ушнаш манын, polus.atom.online/ сайтыште регистрацийым эртыман. Проектыште сеҥыше-влак «50 лет Победы» атомный ледокол дене Йӱдвел полюсыш экспедицийыш каят.
Шымше тургымышто кум тематический трек лиеш:
- «Искатель» (ончыкылык шанчыеҥ, шымлыше да шанче журналист-влаклан);
- «Создатель» (ончыкылык инженер, проектировщик ден конструктор-шамычлан);
- «Мастер» (пашазе специальностьышто тыршаш шонышо-влаклан).
Тений июньышто Москошто отборын финалже лиеш. Российысе кажне федеральный округ гыч кок команде дене тушто шкеныштым тергат. Кажне округ гыч эн сай команде-влак тений августышто экспедицийыш тарванат.