Кугу чанлаште компотым да моло тутло йӱышым шолтеныт, коҥгалаште мелнам кӱэштыныт да шылым кӱктеныт, кӧршӧклаште шӱр шолын… 15-16 августышто Медведево ипподромышто «Йошка Еш» регион-влак кокласе IVгастрономический фестиваль гӱжлен.
Ты фестиваль «Туризм и гостеприимство» нацпроектын да «Гастрономическая карта России» федеральный проектын полшымышт дене эртаралтеш. Тудо ий гыч ийыш тӱзлана да кушкеш гына: тений пайремыш Мӱндыр Эрвел гыч Арктика марте участник-влак чумыргеныт: 12 регион гыч повар, ресторатор, предприниматель-влак ушненыт, повар-влак Российысе тӱрлӧ калыкын 300 наре тӱрлӧ кочкышым темленыт.
«Йошка Еш» фестивальын икымше кечыжлан организатор-влак поян паша да тӱвыра программым ямдыленыт. Марий Эл Республикым Вуйлатыше Ю.Зайцеват пайремым почмашке толын.
– Ты фестиваль, чынжымак, келшымаш да икоян улмо пайрем. Таче чылажат келшен толын. Тӱрлӧ калык тыште пырля улына. Мемнан дек уна-шамыч толыныт, нуно чон шокшыштым, порылыкыштым мыланнат пӧлеклат. Фестивальыште икоян улмо поснак шижалтеш, мемнам чыланнам шуко калыкан Россий уша. Тӱрлӧ улмынаштак кумда элнан вийже шижалтеш, – каласен Юрий Зайцев.
Икымше кечын ик эн тӱҥ событийжылан «Гастрономический код Марийского края» книган презентацийжым шотлыман. Республикысе промышленность, экономике вияҥмаш да торговльо министр Владимир Халюзин, ресторан критик да книган автор-составительже Олег Назаров, кумдан палыме шеф-повар Илья Лазерсонат туризмым вияҥдымаште да верысе производитель-влаклан полшымаште ты проектын кӱлешлыкше нерген палемденыт.
Сцене деч ӧрдыжтат пайрем шӱлыш озаланен. Толшо-влак Костромасе калачым, Поморьесе шаньгам, марий команмелнам тамленыт. Нуно тыгак кочкаш шолтымо мастер-класслаш ушненыт, тӱрлӧ сий дене палдарыше презентацийлаште лийыныт. Марий мурызо да палыме артист-влак уна-влакын кумылыштым нӧлтеныт. Кугыеҥланат, йочаланат йокрок лийын огыл.
Фестивальын икымше кечынжак марий кочкышын – туаран – эн кугу порцийжым ямдылыме рекордым шынденыт. «Тёплая речка» трактирын командыжын кӱэштме 273 туарам поро кумылым ончыктымо йоча организацийлаш колтеныт.
Кокымшо кечат бренд-шеф Иван Антроповын командыжын у тӱнямбал рекордым шындыме дене шарнымашеш кодын – повар-влак эн кужу соктам ямдыленыт. Тудын кужытшо – 77,04 метр. Тылеч посна фестивальыш толшо-шамычлан у мастер-класс-влак, ярмиҥга эртаралтыныт. А кастене пайрем PIZZA группын выступленийже дене мучашлалтын.
«Йошка Еш» фестивальыште Гран-прим «Камчатский дом» Мӱндыр Эрвел кочкыш проект налын. Икымше верым Удмуртийысе «Перепечкин» проектлан пуэныт. Кокымшо вер – Коми гыч «Горизонт событий» гастробарын. Марий Эл гыч «Тёплая речка» трактир кумшо верым налын.
«Йошка Еш» тиде кочкыш дене кылдалтше мероприятий веле огыл, тиде – тӱрлӧ калыкын йӱлаже нерген пален налаш, талантан еҥ-влак дене палыме лияш, тылеч ончыч палыдыме кочкышым тамлен ончаш йӧн. Икманаш, «Йошка Еш» – мӱшкырым темыше да чоным куандарыше пайрем. Фестивальыш толшо кажне еҥлан нине кок кече эн сай шарнымашым гына коден. Тидлан йӱран игечат чаракым ыштен огыл.