Морко. Кӱчыкэҥер. Кок шомакшак шӧртньӧ гае. Мыняре лӱмлӧ еҥым шочыктен, кунар пӱртӱс поянлык дене ила тудо чапланен?! Чылалан палыме еҥ-влак улыт: Михаил Янтемир, Совет Ушем Герой З.А.Краснов, гвардий полковник П.И.Курсов, поэт Миклай Казаков ден Юрий Исаков, Йошкар-Оласе 11-ше номеран лицейыште математикым туныктышо Т.И.Александрова, Эҥерсола школышто тӱҥалтыш классым туныктышо Ю.П.Курсов, Эҥерсола ялын шочшыжо-влак: писатель Геннадий Алексеев, семӱзгарым ыштыше П.П.Эчейкин. Ты вершӧрыштак 1927 ийыште Икымше сӱан ончыкталтын. Кӱчыкэҥер ялыштак черкат лийын улмаш, но вара йӱлен. А тачысе кечын изи часамла уло.
Шукерте огыл Кӱчыкэҥер кундемысе Кораксола ялыште илыше 19 еҥан делегацийым порын вашлие. Тусо вершӧрысӧ пӱртӱс поянлыкым ончен куанаш да М.Казаков лӱмеш тоштер мучко экскурсийым эрташ мыланна пиал шыргыжале.
Мемнан кокла гычын икмынярышт М.Казаков лӱмеш тоштерыште икымше гана лийыныт. Тоштер вуйлатыше Г.К.Сошина чолган да кыртмен тоштерым вуйлатымыжым Морко велне чыланат палат. Галина Климентьевнан мут ярымже тунар поян, колыштын шерет ок тем. Тудо М.Казаков нерген веле огыл, а тусо лӱмлӧ айдеме-влакын пӱтынь илыш корныштым пала да кажныж нерген тыге сайын каласкален кертеш, пуйто чыланышт дене ик ешыште кушкын да кажныже тудлан лишыл. Ик тоштерыште кум чолга пашаеҥ уло кундемжын кугезе йӱлажым арален, аклен да переген ила да тоштерыш толшо уна-влакын чоныштышт кугешнымаш тул сескемым ылыжтен мошта.
Тоштер деч вара корно Ош купыш шуйналте. Тудын моторлыкшо кумылнам савырале. Икымше ойнат тыгайрак лие: «Ончыза, чынак, ошыс вӱдшат!» А «Йошкар сер» курыкшо могане! А вет, чынак, йошкарге улмаш. Икте-весым кучен, кӱшкӧ да кӱшкӧ нӧлталташ эшеат оҥайрак улмаш. Курык вуй гыч ончалат ӱлык да Морко кундемыште тыгай пӱртӱс поянлык улмылан йывыртен колтет. А кӧ моктен тымарте лач Карман курыкым гына, вет Карман курык ден Йошкар сер курыкшо чылт иза-шольо улыт улмашыныс.
Йошкар сер мучко экскурсийым эртымашке, мемнам, 19 еҥым, порын вашлиймашке, М.Казаков лӱмеш тоштерыштак тыршыше вес кок тале еҥ (Альберт Викторович Архипов ден Зинаида Леонидовна Николаева) ушнышт. Тиде кок пагалыме айдеме Йошкар серыште мыланна тамле шӱрым да шудан чайым шолтен ямдылен.
Йошкар сер ден М.Казаков лӱмеш тоштерыш экскурсий дене шке вел калыкемым намиен коштыктымем тыгай пайдалын да кӱкшын эртымылан моткоч чот йывыртенам. Пырля мийыше кажне еҥлан таум каласем. Вет тиде кечын тыгай кугу да пайдале мероприятийым эртарен колтымашке тоштер да Кораксола тӱвыра пӧрт пеленысе «Муро кумыл» фольклор ансамбль уло кумылын ик тӱшкашке ушненна.
Елена Григорьева, Кораксола тӱвыра пӧрт вуйлатыше.
Снимкыште: Йошкар серыште да М.Казаков лӱмеш тоштерыште экскурсийым эртыме годым.
