Кундемыштына Россий калык-влакын икоян улмо идалыклан шкешотан экскурсийым эртарат. «Проводники смыслов. Экскурсоводы» тӱнямбал проект кышкарыште Всероссийский конкурсышто сеҥыше-влак шке авторский программыштым турист-влаклан ончыктат.
Республикыштына авторский экскурсий-шамычым 6 ноябрь марте эртараш пеҥгыдемдыме. Нунын коклаште – экскурсовод Ксения Скрябинан «Йошкар-Ола – один город, две культуры» авторский программыжат.
Виче кундемыште шочын-кушшо, да ынде ятыр ий Марий Элыште илыше экскурсовод лу ий турист-шамыч дене пашам ышта. Нунылан экскурсийым эртарымаш – тӱҥ сомылжо. Ксения – Йошкар-Оласе туристско-информационный рӱдерысе туризм йыжыҥын специалистше. Профессионал семын паша корныжым Йошкар-Оласе историй тоштерыште тӱҥалын. Тушто тудо экспозиций-влак дене палдарыме экскурсий-шамычым эртарен. Ӱдыр – опытан, шуко палыше да шымлыше специалист.
Ксения Скрябина каласкала:
– Такшым рӱдолана нерген тыгай экскурсийым илышыш пурташ шонымаш шукертак лийын, тений тудым шыҥдарен кертынам. Ты экскурсий Йошкар-Ола нерген, куштыжо тӱрлӧ национальностян калык ила. Нунын коклаште руш ден марий-шамыч шукырак улыт.
Экскурсий олан кызытсе чоҥымашыже-влакым авалта, тудын исторический ужашыжым ончыкта. Йошкар-Оласе национальный сымыктыш гимназий деч тӱҥалтышым налеш да Рӱдӧ каныме паркыште мучашлалтеш. Тыгодым олаште руш да марий тӱвыран кыдалатмыжым радамла. Марий калыкын поянлыкше: йылме, фольклор, йӱла дене палымым ышта. А руш историй олалан негызым ыштыме, тудын вияҥмыже, православийын рольжо нерген каласкала. Тыгак регионын да рӱдолан шочмаштыже Российысе историйын влиянийже дене палдара.
Чылаже 10 экскурсийым эртараш палемдыме. Нуно 16, 23, 30 октябрьыште да 2, 6 ноябрьыште 10 шагат гыч 13 шагат марте лийыт. Тушко олаште илыше але унал толшо 12 ияш деч кугурак еҥ-влак ушнен кертыт.
Росмолодёжьын «Больше, чем путешествие» программыжын «Проводники смыслов. Экскурсоводы» проектше почеш конкурс гражданско-патриотический да молодёжь-влак коклаште путешествоватлымашым вияҥдаш полшаш виктаралтын. Тудо 2024 ий годсек эртаралтеш, экскурсийын темыже кажне ийын вашталтеш.
Экскурсийлан оксам тӱлыман огыл. Тушко ушнаш ончылгоч регистрацийым эртыман, provodnikismislov.ru/#paragraph-66 ссылке почеш йодмашым колтыман. Пеҥгыдемдымашым налмеке, электрон билет толеш. Тушто экскурсий могай кечын да могай шагатыште эртаралтме, погынымо вер, экскурсоводын телефонжо ончыкталтыт. Тыланда палемдыме жапыште толаш да экскурсий деч ракатлыкым налаш веле кодеш.