Тыге ойла Марий Турек район Сысоево ял гыч шуко шочшан ава Людмила Скулкина. Чолга марий ӱдырамаш Сысоево кыдалаш школышто тӱҥалтыш класслам туныкта. А эше Людмила Юрьевна – 12 йочалан ава, шымытынже приёмный улыт.
Ойго ешым пеҥгыдыракым ыштен
Людмила Юрьевна ден пелашыже Вячеслав Викторович Орлов 24 ий пырля илат. Вячеслав Викторович школышто ороллан пашам ышта. Вич шочшышт уло (кок эргыже – Людмила Юрьевнан икымше пелашыж деч. Тудо ондакак колен). Кугуракышт – Артём, ешан. Тудо Советский посёлкышто ила, а Родион – Кузбассыште, Шерегеш горнолыжный курортышто пашам ышта. Алина Йошкар-Оласе ик йочасадыште тырша, Ярослава МарГУ-со Физический культур, спорт да туризм факультетыште нылымше курсышто тунемеш, а Александра – Йошкар-Оласе медколледжын кокымшо курсшын студенткыже.
Ача-ава икшывышт-влак дене моткоч кугешнат. Людмила Юрьевна кажне йочажлан тӱрлӧ конкурсышто сеҥымашыштым ончыктышо посна папкым ыштен. Визытынат изинек чолга кушкыныт. Чылан спорт дене кылым кучат. Спорт деке йӧратымаш ача-аваштым ончен шочын. Вет Людмила Юрьевнат, Вячеслав Викторовичат куржталаш, ече дене кошташ йӧратат, шахмат да шашке дене модыт.
Вате-марий шке йочаштланат, попечений деч посна кодшо икшыве-шамычланат чон шокшыштым ситарат. Опеке деч посна улшо шым йочалан ача-ава йӧратымашым пуат, порылыклан, илышлан туныктат.
– 2017 ийыште ешыштына ойго лийын, шӱжарем колен. Тудын 11 ияш Сония ӱдыржӧ кодын. Шуко шоныде, Сониям опекыш налынна. Тидлан тунеммашым эртенам, приёмный ава лийын кертмем пеҥгыдемдыше свидетельствым налынам да кӱлеш чыла документым погенам, – палдара Л.Скулкина.
Кушто икыт – тушто кокыт…
Икшыве-влак кушмо дене Людмила Юрьевна йочапӧрт гыч эше ньогам кондымо нерген чӱчкыдын шонаш тӱҥалын. Ешыже тидлан тореш лийын огыл. Содыки суртышто йоча йӱк-йӱан уло гын, тиде – куан. Тыге 2022 ий сентябрьыште Медведево район Лӱльпан йочапӧрт гыч кок иза-шольым, куд ияш Саша ден вич ияш Лёшам, мӧҥгышкышт конденыт.
– Ах, пӱрымаш. Сулыкдымо ньога-влаклан изинек илышын кочыжым тамлашышт логалын. Саша ден Лёшан ешыштышт куд йоча лийын. Кугурак акашт Савинысе школ-интернатыште тунемын. Иза ден эше ик акашт Моркышто, а шӱжарышт Йошкар-Олаште приёмный ешлаште иленыт. Шкешт нуно Советский район гыч улыт. Коклаштышт кыл ынже йом манын, мый опекун-влакын телефон номерыштым налынам. Йыҥгыртен, вашла мутланат.
Неле лийын. Саша моткоч лӱдын, кунам тудым коден каем ыле – мӧҥгеш йочапӧртыш колтат манын шонен.
Изак-шолякым ешышкына кондымеке, чот ӧрынна. Нуно кочкын темын огыт керт ыле. Опекун-влак дене мутланен умыленна: нуно мӧҥгыштышт чӱчкыдын шуко жаплан шкет кодыныт, кочкыш ситен огыл, шужен иленыт. Сандене шапаш кочкыныт, трук эрла нимом кочкаш манын шоненыт, – каласкала Людмила Юрьевна.
Саша ден Лёшам кондымеке, идалык гыч Л.Скулкиналан эмлымверыште вич ияш Миланам да кум ияш Ваням опекыш налаш темленыт. Нуно пошкудо Косолап села гыч улыт. Авашт колен, ачаштым права деч посна коденыт, а кока ден чӱчӱшт нунын деч отказатлалтыныт.
– Тений Ваня икымше классыш кая. Милана рвезе-влак коклаште кушкын, йокрокланымыжым шекланенам, тудлан йолташ ӱдыр кӱлын. Марий Элысе Паша да социальный аралтыш министерствын опеке да попечительстве пӧлкашкыже каенам да ик ӱдырым мыланна ойыраш йодынам. Тыге ӱмаште куд ияш Евам да тудын шым ияш Савелий изажым ешышкына конденна. Шкешт нуно Оршанке район гыч улыт, – ойла сай ава.
Пырляште весела, ласка
Людмила Скулкина ден Вячеслав Орловын кугу ешышт чолга. Нуно тӱрлӧ конкурсышко, спартакиадышке, «Уло еш дене» Всероссийский проектыш эреак ушнат. «Мыйын ешем – мыйын поянлыкем», «Идалыкысе еш» да моло конкурсын лауреатышт улыт. Ятыр наградышт пӧрт пырдыжым, ӱстембалым сӧрастара. Сеҥымаш-влак ешын икоян улмыжым ончыктат. Людмила Юрьевна ден Вячеслав Викторович икшывышт-влакым пашалан туныктат. Пырля чодыраш емыж-саскам, поҥгым погаш коштыт. Ава каласкала:
– Йоча пушкыдо модыш огыл, кудым ик верыш шындет да тушто шып шинча. Тудо шке койыш-шоктышан, шке кумылан личность. Чылан тӱрлӧ улыт, кажныж деке кутырен моштыман. Тӱҥжӧ – йочам йӧратыман, тунам тудо чонжым тыланда почеш. Чын, мӧҥгыштӧ мемнан эре йӱк-йӱан, южгунамже пӧртымат эрыктен от шукто. Но мый тидлан куанем веле. Вет таза йоча куржталыштшаш, тӧрштылшаш, юарлышаш.
Ме жапым пырля эртараш тыршена. Зоопаркыш, пошкудо Кугу Вочарма ялыш имньым ончаш кошташ йӧратена. Экскурсий дене тӱрлӧ верыш лектына. Йошкар-Олаште спектакльым ончаш куанена.
Мӧҥгыштӧ колоем-влак мыланна эре полшат. Кок пырысым, кок пийым, попугайым, черепахым, икмыняр кролик ден казам, кӧгӧрчен-шамычым ашнена. Йоча-шамыч нунын дене модыт, нуным пукшат.
Пырля тӱрлӧ пакчасаскам, пеледышым куштена. Шукерте огыл интернет дене вӱдуа воштыр гыч руш пальме манмым пидаш тунемынна.
Паша деч огына лӱд. Ваш келшен, полшен, эҥертен илена.
Еш альбом гыч налме фото-влак.